Ճիշտ կլիներ վարչապետն ասեր, որ 1-ին դատավորը, որ «կամովին» կընտրի թոշակը կստանա խոստացած գումարի կրկնակին. Ա. Բաբայան

Ազգային ժողովի աշխատակազմի ղեկավարի նախկին տեղակալ, Ազգային հակակոռուպցիոն խորհրդի անդամ Արսեն Բաբայանը ֆեյսբուքյան իր էջում գրառում է կատարել՝ անդրադառնալով ՍԴ դատավորների վաղ կենսաթոշակի մասին օրենքին: Գրառումն ամբողջությամբ՝ ստորև.

«Ճիշտ կլիներ ՍԴ դատավորների թոշակի գնալը խրախուսելու համար վարչապետը հայտարարեր, որ առաջին դատավորը, որ «կամովին» կընտրի թոշակը կստանա խոստացած գումարի կրկնակին, իսկ եթե Հրայր Թովմասյանի դեմ ցուցմունք էլ տա, ապա իր ընտրությամբ կստանա այդ կրկնակի կրկնակին կամ ցմահ հուդա կոչումը»:

Ավելի վաղ NEWS.am-ը հայտնել էր, որ այսօր ՍԴ-ում ՀՔԾ ներկայացուցիչները հարցաքննել են ՍԴ նախագահ Հրայր Թովմասյանին, որից հետո նրան մեղադրանք է առաջադրվել ՀՀ ՔՕ-ի 308-րդ հոդվածի 2-րդ մասով (Պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ): Խոսքը նույն քրեական գործի մասին է, որով մեղադրանք էր առաջադրվել Թովմասյանի սանիկին՝ Նորայր Փանոսյանին։

Հիշեցնենք, որ երեկ՝ դեկտեմբերի 26-ին, ՀՀ նախագահ Արմեն Սարգսյանը ստորագրել է «Սահմանադրական դատարանի մասին» սահմանադրական օրենքում լրացումներ կատարելու մասին, «Պաշտոնատար անձանց գործունեության ապահովման, սպասարկման եւ սոցիալական երաշխիքների մասին» օրենքում լրացում կատարելու մասին ՀՀ օրենքների փաթեթը՝ ՍԴ դատավորներին վաղ կենսաթոշակի ուղարկելու մասին։ Դրանից անմիջապես հետո ՀՔԾ քննիչները գնացել էին ՍԴ, սակայն պարզ չէ, թե ինչ նպատակով։