Հիմա որ ասեմ՝ քյաբաբ առ քյաբաբ բացահայտելու ենք, պետք է ասեն, որ ատելության քարոզ է իրականացվում. Նիկոլ Փաշինյան

Հայաստանում կան ուժեր, որոնք փորձում են ներկայացնել, թե ՀՀ կառավարությունն իր վարած քաղաքականությամբ հակադրվում է ընտանեկան արժեքներին: Կառավարության նիստի ժամանակ հայտարարեց ՀՀ վարչապետ Նիկոլ Փաշինյանը:

«Մեր կառավարությունը որդեգրել է երեխաներին ընտանիքներ վերադարձնելու քաղաքականություն, իսկ երեխաներին ապօրինի որդեգրելու մեխանիզմները գոյություն են ունեցել այն իշխանության տարիներին, որոնք ազգային արժեքների դրոշը բռնած արել են բաներ, որոնք մենք գիտենք: Հետաքրքիր է, որ 2003 թվականից ՀՀ պարտավորությունն է եղել մանկատների երեխաներին ապահովել բնակարանով, և «ազգային կառավարություններն» ու նրանց հարակից կուսակցություններն այդ հարցը չեն լուծել: Մարդիկ են եղել, որ այդ ընթացքում նախարար են եղել, բնակարանաշինություն է տեղի ունեցել մանկատների երեխաներին բնակարանով ապահովելու համար, սակայն բնակարանները չեն հասել այդ երեխաներին: Հիմա որ գնանք ու պարզենք ինչ-որ բաներ ինչի արդյունքում այդ մարդիկ հայտնվեն բանտում, կասեն, որ նրանք քաղաքական հալածյալներ են, հանուն ազգի քաղաքական հալածյալ են»,-ասաց վարչապետը:

«Հանուն ազգի պետական միջոցների քյաբաբների վրա ծախսածները հիմա ՀՀ-ում հանդես են գալիս ազգային արժեքների պաշտպանությամբ: Հիմա որ ասեմ՝ քյաբաբ առ քյաբաբ բացահայտելու ենք, պետք է ասեն, որ ատելության քարոզ է իրականացվում»,-հավելեց Նիկոլ Փաշինյանը:

Աշխատանքի և սոցիալական հարցերի փոխնախարարն իր հերթին ասաց, որ մանկատան 18 շրջանավարտի արդեն հանձնվել է բնակարանների վկայագրերը, փորձ է արվում հնարավորինս սեղմ ժամկետներում բոլորի վկայագրերը հանձնել: