Կառավարությունը 4 մլն դրամ կհատկացնի «Ծնողական փառքի» մեդալով պարգեւատրված 9 ընտանիքի

Կառավարությունն իրա այսօրվա՝ դեկտեմբերի 19-ի նիստում որոշում կայացրեց պետական բյուջեից 4,32 մլն դրամ հատկացնել 9 ընտանիքի։

Ըստ Կառավարության ներկայացրած նախագծի՝ առաջարկվում է սահմանել 6 եւ ավելի երեխա ունեցող եւ «Ծնողական փառքի» մեդալով պարգեւատրված ծնողների համար ամսական ֆինանսական աջակցության տեսակ, որն ավելի կընդգծի նրանց ունեցած ավանդը ժողովրդագրական իրավիճակի բարելավման եւ առաջընթացի գործում: Ամսական այդ ընտանիքները կստանան 40 հազար դրամ:

Նշենք, որ «Ծնողական փառքի» մեդալով պարգեւատրված ծնողների (ընտանիքների) թիվն ինն է, եւ նրանց տվյալ տարվա ՀՀ պետական բյուջեից լրացուցիչ կտրամադրվի 4.320.0 հազար դրամ։

Նախագծի հիմնավորման մեջ նշված է, որ ներկայում ՀՀ-ում շատ քիչ ընտանիքներ են ունենում 3 եւ ավելի երեխա: Եթե 1990թ. ՀՀ-ում 3-րդ եւ հաջորդ երեխաների թիվը ընդհանուր երեխաների կարգաթվում եղել է 32 տոկոս, ապա ներկայում այդ ցուցանիշը 22 տոկոս է:

2017թ. տվյալներով՝ ՀՀ-ում ծնված 6-րդ եւ հաջորդ երեխաների թիվը կազմել է 140 երեխա, որը տվյալ տարվա ընդհանուր ծնունդների ընդամենը 0,4 տոկոսն է: Ժողովրդագրական նոր քաղաքականության առանձնահատկություններից է այն, որ ՀՀ կառավարությունը նախորդ ժամանակահատվածում գրանցված ժողովրդագրական անբարենպաստ իրավիճակի բարելավման կարեւոր ուղենիշ է սահմանել ծնելիության խրախուսումը եւ երեխաների ընդհանուր կարգաթվում 3-րդ եւ հաջորդ երեխաների ծնունդների աջակցությանն ուղղված քաղաքականությունը: