«Հանգիստ քնեք, իմ նախնիներ». Թինա Կանդելակիի գրառումն ու Մարգարիտա Սիմոնյանի արձագանքը

Դեռ շատ մարդիկ կասեն շնորհակալություն, կկիսվեն իրենց զգացմունքներով և հույզերով: Շատերը դեկտեմբերի 12–ն արդեն պատմական են անվանել:

Հայտնի հեռուստահաղորդավարուհի և բիզնես լեդի Թինա Կանդելակին հուզական գրառում է արել Telegram- ի իր ալիքում՝ մեկնաբանելով ԱՄՆ Սենատի որոշումը Հայոց ցեղասպանության ընդունման վերաբերյալ:

«Պատմական օր է հայ ժողովրդի համար։ Հանգիստ քնեք իմ նախնիներ։ Մենք աղոթում ենք ձեզ համար, երբեք չենք մոռանա այդ ողբերգությունը և ոչ մեկին չենք թողնի, որ մոռանա», - գրել է մայրական կողմից հայուհի Թինան։

Հաղորդավարուհու գործընկերուհի և ընկերուհի, RT- ի և Sputnik- ի գլխավոր խմբագիր Մարգարիտա Սիմոնյանը մեկնաբանել է Կանդելակիի գրառումը և շնորհակալություն հայտնել նրան հայերենով։

«Ապրես, ջան»,–գրել է նա:

Սիմոնյանը նաև մեկնաբանել է Караульный հեռուստաընկերության տելեգրամ ալիքի գրառումը։ Խմբագրությունը կարծես թե տոնել է այս իրադարձությունը հայերից ոչ պակաս` նշելով, որ «ուժը ճշմարտության մեջ է»։

«Караульный հեռուստաալիքի խմբագիրներ, հոյակապ է, ես հայտնում եմ իմ շնորհակալությունը, որն ուղեկցվում է արցունքներով։ Անցյալ հարյուրամյակին իմ նախնիների արյունն է թափվել, դաժանորեն խոշտանգվել են նրանք 1915 թվականին: Մենք հիշում ենք: Շնորհակալ եմ, որ դուք էլ եք հիշում», - գրել է Սիմոնյանը:

Հիշեցնենք` ԱՄՆ Սենատը երեկ միաձայն ընդունեց Հայոց ցեղասպանության ճանաչման բանաձևը։ Այն 4-րդ անգամ ներկայացրել էին սենատորներ Ռոբերտ Մենենդեսն ու Թեդ Քրուզը։

Հայոց ցեղասպանության մասին բանաձևը (S.Res.150) սահմանում է հրաժարվել Հայոց ցեղասպանությունը ժխտելուց, ԱՄՆ–ի կառավարության կողմից պաշտոնապես ճանաչել Հայոց ցեղասպանությունը և հարգել Ցեղասպանության զոհերի հիշատակը, իրազեկել Հայոց ցեղասպանության մասին` ապագայում նման հանցագործությունները կանխելու նպատակով։

Աղբյուրը՝ armeniasputnik.am