Ինչպե՞ս բարելավել քնի որակը. 4 պարզ խորհուրդ սրտաբանից

Վատ քունը բարձրացնում է սիրտ-անոթային եւ բազմաթիվ այլ հիվանդությունների առաջացման վտանգը, հավաստիացնում է սրտաբան Մարտին Հալեն (Գերմանիա)։ Focus ամսագրին տված հարցազրույցում նա ներկայացրել է, թե ինչ կարելի է անել քնի որակը բարելավելու համար։

Առողջ եւ որակյալ քունը, մասնագետի խոսքով՝ համապատասխանում է մարդու 24-ժամյա բիոռիթմերին։ Առավոտյան օրգանիզմն արտադրում է որոշակի հորմոններ, որոնք պահպանում են ակտիվությունը եւ առույգությունը ու նվազեցնում քնի հորմոնների քանակը, իսկ երեկոյան կատարվում է հակառակը։

«Մեր բիոռիթմերը գենետիկորեն կանխորոշված են, եւ դրանք հեշտ չէ փոխել։ Եթե մենք փոխում ենք դրանք՝ առույգ լինելով գիշերը կամ քնելու համար պառկելով առավոտյան, ուղեղն սկսում է արտադրել նյութեր, որոնք կարող են խախտել օրգանիզմի կարեւոր գործընթացներ»,- ասել է Մարտին Հալեն։

Նրա խոսքով՝ քնի արդյունքում, որը չի համապատսխանում բնական բիոռիթմերին, կարող են բորբոքվել անոթները, ինչպես նաեւ խախտվում է սննդի եւ էներգիայի սպառման հավասարակշռությունը, ինչի հետեւանքն է դառնում ճարպային զանգվածի աճը։

Սրտաբանը տվել է չորս պարզ խորհուրդ, որոնք կարող են օգնել բարելավելու քնի որակը եւ նվազեցնելու սրտի հիվանդությունների, ճարպակալման, դիաբետի եւ շատ այլ խնդիրների առաջացման վտանգը.

. Քնել օրական 7 ժամից ոչ պակաս;

. Պառկել քնելու եւ արթնանալ օրվա նույն ժամերին, այդ թվում եւ հանգստյան օրերին;

. Ձգտել չօգտագործել կոֆեին կեսօրից հետո, հատկապես եթե զգայուն եք դրա հանդեպ;

. Հրաժարվել երեկոյան ալկոհոլ օգտագործելուց։