Ադրբեջանցիները Վրաստանից իրենց հայի տեղ էին դնում. Ադրբեջանում հայտնաբերել են սկանդալային տեսանյութի մասնակիցներին (տեսանյութ)

Ինչպես հաղորդում է ադրբեջանական «İTV» հեռուստաալիքը, անձինք, որոնք Բաքվում մեկ ամիս առաջ մեքենայի մեջ հայկական երաժշտություն էին լսում, ներկայանալով Երևանի բնակիչ, հայտնաբերվել են:

Տեսանյութը լայն տարածում և արձագանք էր գտել սոցիալական ցանցերում:

«Այսպես են հայերը Բաքվում ժամանակ անցկացնում», - ասում էին բերման ենթարկվածները:

Ինչպես հաղորդում է Ադրբեջանի Հանրային հեռուստաընկերությունը, «Հայերը Բաքվում» հայտնի տեսանյութի մասնակիցները ադրբեջանցիներ էին Վրաստանից, որոնք ժամանել էին Բաքու հարսանեկան արարողությանը մասնակցելու համար:

Հարկ ենք համարում նշել, որ ժողովուրդներին խաղաղության նախապատրաստելու հայտարարություններին և գործընթացին զուգահեռ ադրբեջանական կողմից շարունակվում են գրանցվել հայատյացության դեպքեր:

Պաշտոնական Բաքվի համար շարունակում է անընդունելի մնալ հայկականի հետ կապ ունեցող ամեն բան՝ ընդհուպ մինչ իրենից ոչ մի սպառնալիք չհանդիսացող հայկական երաժշտություն լսելը:

Նշենք նաև, որ մինչ Ադրբեջանում անմիջապես օդանավակայանից և սահմանագծից այս կողմ չեն թողնում հայկական ծագում ունեցող, բայց այլ երկրի քաղաքացի հանդիսացող անձանց մուտքը այդ երկիր, Հայաստան հանգիստ մուտք են գործում Իրանից ազգությամբ ադրբեջանցիներ: Եւ ոչ մեկ նրանց բերման ու կտտանքների չի ենթարկում: