Կարող եմ տաքսիների երթուղիները ցույց տալ․ Արայիկ Հարությունյանը՝ մետրոյով երթեւեկելու մասին

Իմ ունեցած տեղեկություններով՝ երեկ ՀՅԴ երիտասարդների նկատմամբ ոստիկանների գործողությունները եղել են համաչափ, մնացածը համապատասխան մարմինները ըստ բողոքների եւ հայտարարությունների։ Այս մասին այսօր՝ դեկտեմբերի 4-ին, լրագրողների հետ զրույցում ասաց ԿԳՄՍ նախարար Արայիկ Հարությունյանը։

«Այսօր ՀՅԴ երիտասարդական կառույցի ներկայացուցչի պահվածքը ցույց տվեց, որ իրենց համար այնքան հետաքրքիր չեն քննարկումները, որքան այն պահվածքը, որ այսօր կար եւ քաղաքական շահարկումները։ Մենք ունեինք տեղեկություն, որ նման մի բան պետք է տեղի ունենար այդ հանդիպմանը, դրա համար մենք հրավիրել ենք այս հարթակներին։ Մանավանդ, որ իրենք 2 օր առաջ գրանցվել էին այս հարթակին, որ գալու են քննարկման»,-նշեց նա։

Հարցին՝ իր հրաժարականի պահանջը շարունակո՞ւմ է մնալ երիտասարդների օրակարգում, ինքը պատրաստվում է հրաժարական տալ, նախարարն ասաց․ «Ոչ, յուրաքանչյուր քաղաքական ուժ ունի իր օրակարգը, իսկ այլ քաղաքական ուժի ներկայացուցիչն ինքն է որոշում՝ լինել այդ քաղաքական օրակարգի մեջ, թե ոչ։ Սա կեղծ օրակարգ է, որոշակի քաղաքական ուժի վերակենդանացման փորձեր են, կարծում եմ՝ սա լավ փորձեր եւ լավ օրակարգ չի, ափսոս իմ խորհրդին չեն հետեւել»։

Հարցին՝ պատրաստվում է մետրոյով երթեւեկել, Արայիկ Հարությունյանն արձագանքեց․

«Ես շաբաթ-կիրակի օրերին, եթե գործնական հանդիպում չի, ես տրանսպորտից եմ օգտվում, կարող եմ տաքսիների երթուղիները ցույց տալ, քաղաքային տրանսպորտից եմ օգտվում»։