Հայաստանի և Ադրբեջանի ԱԳ նախարարների հանդիպումը լինելու է շատ շուտով

Հայաստանի և Ադրբեջանի արտաքին գործերի նախարարների մակարդակով հանդիպումը լինելու է շատ շուտով: Այս մասին լրագրողների հետ ճեպազրույցում ասաց ՀՀ ԱԳ նախարար Զոհրաբ Մնացականյանը` նշելով նաև, որ երկրների ղեկավարների մակարդակով հանդիպում այս պահին չի ծրագրվում:

«Բայց կարող է ամեն ինչ լինել, կարող է ցանկացած ուղղությամբ զարգանալ, եթե անհրաժեշտ լինի դա»,-ասաց նախարարը:

Անդրադառնալով հարցին, թե վարչապետ Նիկոլ Փաշինյանի` «Արցախը Հայաստան է, և վերջ» հայտարարությունն ինչպես է ընդունվել միջազգային հանրության կողմից և չի ազդել բանակցային գործընթացի վրա, Մնացականյանը պատասխանեց, որ հայկական կողմի դիրքորոշումներով փոփոխություններ չեն եղել, բանակցային գործընթացի թիրախային և նպատակաուղղված աշխատանքները շարունակվում են:

«Մենք երբևէ չենք դադարեցրել, երբևէ չենք ձգձգել գործընթացը: Նաև կան որոշ գաղափարներ, և թե ինչպես պետք է կազմակերպել ղեկավարների մակարդակով հանդիպումները: Ամենակարևորը, որ այդ գործում մենք ունենք մեր հստակ դիրքորոշումները, որոնք ուղղված են հետևյալին` ապահովել այնպիսի ձևաչափ, այնպիսի դաշտ, որտեղ համադրելի են կողմերի պարտավորությունները: Չի կարող լինել այնպիսի իրավիճակ, երբ մի կողմը առավելապաշտական դիրքորոշումներով փորձի ստանալ ամենը, մյուս կողմը` ոչ: Այս ամենը փակուղու է տանելու, բայց մենք ունենք մեր մոտեցումները»,-, ասաց նախարարը` ընդգծելով, որ պետք է լինի այնպիսի համադրության, որտեղ հայկական կողմի շահերը` անվտանգություն և ստատուս, պահպանվեն:

«Այժմ որևէ փակուղի չկա, համենայն դեպս, ինչը մեզ է վերաբերում, մենք որևէ փակուղի չենք տեսնում, շարունակում ենք հանգիստ և սառնասիրտ աշխատել, որովհետև սա աշխատանք է, որը պետք է արվի: Այս աշխատանքը վերաբերում է մեր անվտանգությանը, տարածաշրջանի անվտանգությանը, խաղաղություն հաստատելուն, և զգացմունքային դաշտում աշխատելը լուրջ չէ և անպատասխանատու է»,-ասաց Զոհրաբ Մնացականյանը: