Իսրայելական դրոններ արտադրողը Ադրբեջանում ներկայացուցչություն է բացել

Իսրայելական «Israel Aerospace Industries LTD.» ընկերությունը Ադրբեջանում ներկայացուցչություն է բացել: Այս մասին հայտնում է «Ինտերֆաքսը»՝ վկայակոչելով Ադրբեջանի հարկերի նախարարությանը:

«Israel Aerospace Industries LTD-ի ներկայացուցչությունն Ադրբեջանում գրանցվել է օգոստոսի 22-ին»,- նշել են գերատեսչությունից: Ընկերության պաշտոնական ներկայացուցիչն է Իսրայելի քաղաքացի Բրաիման Զեեւը:

Իսրայելական լրատվամիջոցների տեղեկություններով՝ Israel Aerospace Industries-ը Ադրբեջանի հետ ակտիվորեն համագործակցում է: Մասնավորապես՝ ընկերությունից Ադրբեջանը գնել է «Harop» անօդաչուն եւ այլ սարքավորումներ:

Israel Aerospace Industries-ը, IAI (Իսրայելի ավիացիոն արդյունաբերություն), որը հիմնադրվել է 1953 թվականին, գործունեություն է իրականացնում ռազմաարդյունաբերական համալիրի ոլորտում: Ընկերությունը, մասնավորապես, զբաղված է ավիատեխնիկայի եւ ավիոնիկայի, տիեզերական արբանյակների, կապի եւ հետախուզության համար սարքերի եւ սարքավորումների արտադրությամբ, անօդաչու թռչող սարքերի աշխարհում առաջատար մշակողներից եւ արտադրողներից մեկն է, դրանցից մի քանիսը նմանակը չունեն ավիաշինության համաշխարհային պրակտիկայում: IAI-ն Իսրայելի առաջատար տեխնոլգիական-արդյունաբերական ընկերություններից մեկն է, որտեղ աշխատում է մոտ 16 հազար մարդ, վաճառքի տարեկան ծավալը անցնում է 3,3 մլրդ դոլարից, նշում է աղբյուրը: