Թունավոր սարդերը լցվել են բնակարան և խայթել քնած տղամարդուն

Անգլիական Սաութհեմփթոն քաղաքում «սև այրի» անունով հայտնի թունավոր սարդը խայթել է հորն ու որդուն: Այդ մասին Lenta.ru-ի փոխանցմամբ՝ հայտնում է The Sun-ը:

Աղբյուրի հաղորդմամբ՝ 26-ամյա Լյուիս Պիրսը մի օր արթնացել է և հայտնաբերել, որ իրեն գիշերը 5 սարդ է խայթել: Տղամարդ զննել է իր երեխաներին և նույն նշաններն է գտել նաև իր երեք տարեկան որդու՝ Ֆրեդիի մարմնի վրա: Սուր ցավերի պատճառով բրիտանացին չի կարողանում աշխատանքի գնալ, նույնիսկ՝ ցնցուղ ընդունել:

Պիրսը վախենում է Ֆրեդիի, ինչպես նաև իր հնգամյա դստեր Լեյսիի և յոթ ամսական Բեթանիի անվտանգության համար: «Ես ամենաշատն Բեթանիի համար եմ վախենում, քանի որ նա մեր սենյակում է քնում, իսկ սարդերը հենց գիշերն են հարձակվել ինձ վրա», - ասել է հայրը:

Ըստ Պիրսի կնոջ՝ եթե թունավոր սարդերը երեխաներին այնպես խայթեն, ինչպես ամուսնուն, ապա նրանք փրկվելու շանս չեն ունենա: Պիրսը դիմել է տեղի իշխանություններին՝ խնդրելով օգնել բնակարանից վերացնել «սև այրիներին», սակայն իրեն պատասխանել են, որ իրենք «սարդերով չեն զբաղվում»: Ավելի ուշ, Սաութհեմփթոնի քաղաքային խորհուրդը հայտնել է, որ լրջորեն քննարկում է ներկայացված բողոքը: