Չեռնոբիլից օղին հանրահայտ է դառնում լոնդոնյան բարերի այցելուների շրջանում

Մեծ Բրիտանիայում նորաձեւ են դառնում չեռնոբիլյան ռադիոակտիվ անվտանգ «Ատոմիկ» փորձարարական օղու հիմքով կոկտեյլները, իսկ առեւտրի ցանցերը եւ փաբերը սպասում են բրիտանացի եւ ուկրաինացի գիտնականների նոր արտադրանքի զանգվածային արտադրության մեկնարկին: Այս մասին «ՌԻԱ Նովոստի»-ին հայտնել է Պորտսմուտի համալսարանի պրոֆեսոր Ջին Սմիթը, որն աշխատել է ոգելիցի ստեղծման վրա:

Գիտնականները օգոստոսին փորձարարական ալկոհոլ էին ներկայացրել, որը պատրաստված էր Չեռնոբիլի հորերից հանված ջրից, թորած ալկոհոլից եւ ցորենից՝ աճեցված օտարման գոտում:

Սմիթի խոսքով՝ ավանդական «homemade» մեթոդով պատրաստված եւ համային որակով ինքնաթոր օղուն նման ըմպելիքը հետաքրքրել է առեւտրի ցանցերին եւ փաբերին:

Լոնդոնի բարերից մեկի այցելուները, որտեղ մատուցում են չոռնոբիլյան օղու հիմքով կոկտեյլ նույնպես բարձր են գնահատել նոր ըմպելիքի համային որակները: «Մենք Լոնդոնի Սոհո շրջանում կոկտեյլի բարում խորհրդավոր ըմպելիքի թեստավորում ենք անցկացրել: Բարմենը, որը մեր ըմպելիքի հիմքով կոկտեյլ էր պատրաստում, դրանից անչափ գոհ է մնացել: Նա նաեւ ասել է, որ դա հիմա նորաձեւ է, եւ այցելուները նախընտրում են ոչ թե բարձր թորման հիմքով օղին, այլ ինքնաթոր օղու տեսակի արտադրանքի հիմքով: Դա ըմպելիքին լրացուցիչ համ է տալիս»,- ասել է գործակալության զրուցակիցը:

Պրոֆեսորը նշել է, որ նոր ըմպելիքի մասշտաբային արտադրության համար անհրաժեշտ է թույլտվություն եւ լիցենզիաներ ստանալ Ուկրաինայի, Ռուսաստանի եւ Բելառուսի իշխանություններից: Նախատեսվում է, որ արտադրությունը կկազմակերպվի Ուկրաինայի պարտադիր արտաբնակեցման գոտում: «Մենք հույս ունենք այս տարի մի քանի հարյուր շիշ արտադրել»,- ասել է գիտնականը:

Սպասվում է, որ նոր արտադրանքի արտադրությամբ կզբաղվի հատուկ ստեղծված «Չեռնոբիլյան ալկոհոլային ընկերություն» ձեռնարկությունը, որը մտադիր է շահույթի 75 տոկոսը վերադարձնել վթարից տուժածներին:

Չեռնոբիլի ԱԷԿ-ում վթարը տեղի էր ունեցել 1986 թվականի ապրիլի 26-ին, երբ պայթել էր կայանի 4-րդ էներգաբլոկի միջուկային ռեակտորը: Բելառուսում ռադիացիոն աղտոտվածության ընդհանուր մակերեսը կազմում էր մոտ 46,5 հազար քառակուսի կիլոմետր (ընդհանուր մակերեսի 23 տոկոսը): Ուկրաինայում աղտոտվել էր 12 մարզերում 50 հազար քառակուսի կիլոմետր: Դրանից բացի, ռադիոակտիվ աղտոտման հետեւանքով տուժել էր ռուսական 19 շրջան՝ մոտ 60 հազար քառակուսի կիլոմետր տարածքով եւ 2,6 մլն մարդ բնակչությամբ: