Ակսյոնովը Զելենսկիին խորհուրդ է տվել գալ Ղրիմ և ընդունել բնակիչների ցանկությունը` Ուկրաինայի կազմ վերադառնալու վերաբերյալ

Ռուսաստանի Դաշնության կազմի մեջ մտնող Ղրիմի ղեկավար Սերգեյ Ակսյոնովն Ուկրաինայի նախագահ Վլադիմիր Զելենսկիին խորհուրդ է տվել գալ Ղրիմ և լսել տեղի բնակիչների կարծիքն այն մասին, թե ցանկանո՞ւմ են նրանք արդյոք կրկին լինել Ուկրաինայի կազմում: Այս մասին հայտնում է «РИА Новости»-ն:

«Ուկրաինացի բոլոր քաղաքական գործիչները պետք է խոստովանեն ճշմարտությունը. Ղրիմը ռուսական է և դա մշտական է: Կա ժողովրդի ցանկությունը, և ոչ-ոք դա փոխել չի կարող: Որքան արագ նրանք դա հասկանան, այնքան հեշտ կլինի թե մեզ, թե Ուկրաինայի համար:

Ինչ վերաբերում է Զելենսկիին, թող գա, տեսնի, թե ինչ է կատարվում այստեղ, հարցեր տա մարդկանց և պարզի` ցանկանո՞ւմ են նրանք կրկին լինել Ուկրաինայի կազմում: Թող լսի պատասխաններն ու ընդունի դրանք և անի այնպես, ինչպես ցանկանում են Ղրիմի բնակիչները»,- ասել է Ակսյոնովը:

Հիշեցնենք, որ Ղրիմը Ռուսաստանին է միացվել 2014 թվականին՝ ժողովրդական հանրաքվեի միջոցով։