Վենեսուելան կրկին հայտնվել է մթության մեջ. Մադուրոն զանգվածային անջատումները «հանցավոր հարձակում» է որակել

Հուլիսի 22-ին Վենեսուելայում հերթական անգամ էլեկտրաէներգիայի զանգվածային անջատումներ են եղել, հաղորդում է BBC-ն: Անջատումները սկսվել են տեղի ժամանակով ժամը 16:40-ի սահմաններում և գրանցվել երկրի ամբողջ տարածքում:

Երկրի նախագահ Նիկոլաս Մադուրոն էլեկտրաէներգիայի զանգվածային անջատումները «հանցավոր հարձակում» է որակել:

«Մեր հայրենիքի հանգստության և խաղաղության դեմ արված նոր հանցավոր հարձակման ֆոնին կառավարությունն ու զինված ուժերը քաղաքացիների կողքին են: Մենք կրկին ցույց կտանք մեր աննկուն կամքը»,- թվիթերյան իր էջում գրել է Մադուրոն:

Հիշեցնենք, որ մարտ ամսին լատինամերիկյան պետությունում վթար էր տեղի ունեցել, ինչի հետևանքով իրենց մասշտաբով աննախադեպ հոսանքազրկումներ էին գրանցվել, երկրի 23 նահանգներից առնվազն 20-ը հայտնվել էր մթության մեջ: Երկրի ամբողջ տարածքում ձեռնարկությունների ու պետական հաստատությունների աշխատանքը գրեթե մեկ շաբաթով դադարեցվել էր:

Նախագահ Մադուրոն կատարվածի համար «ամերիկյան իմպերիալիզմին» էր մեղադրել: ԱՄՆ պետքարտուղարությունը հերքել էր նման մեղադրանքները: Վենեսուելայի ինքնահռչակ նախագահ Խուան Գուաիդոն էլ իր հերթին հայտարարել էր, որ հոսանքազրկումը «ուզուրպատորի անարդյունավետության ապացույցն» է՝ նկատի ունենալով Մադուրոյին:

Բաժանորդագրվեք Top-News.am-ին Telegram-ում