Հնդկաստանում վագրը մտել է տուն ու քնել անկողնում

Վագրին, որը փախել էր Հնդկաստանի հեղեղված Ասսամ նահանգի Կազիրանգա ազգային պարկից, գտել են տեղի բնակիչներից մեկի տանը՝ անկողնում։ Բի-Բի-Սի-ն գրում է, որ Կազիրանգայում ուժեղ հեղեղումների պատճառով ավելի քան 80 կենդանի է սատկել։

Հնդկաստանի վայրի բնության պահպանության միության աշխատակիցները գնացել են այդ տուն և ապահովել են կենդանու անվտանգ դուրս բերումը։ Հատուկ միջանցքով նրան տարել են ջունգլու ուղղությամբ։ Սակայն վստահ չեն, որ նա հասել է անտառ, հնարավոր է, որ դեռ այդ կողմերում պտտվում է։

Նշվում է, որ նա տուն է մտել ուրբաթ վաղ առավոտյան, բարձրացել է մահճակալի վրա և քնել ողջ օրը։

Տանը բնակվողներն անհապաղ լքել են տունը, երբ մուտքի մոտից տեսել են, թե ով է իրենց հյուրը։ Տանտերն ասել է, որ սավանն ու բարձը, որի վա հանգստացել է վագրը, կպահի որպես մասունք։

Կազիրանգա ազգային պարկը գտնվում է ՅՈՒՆԵՍԿՕ-ի պահպանության տակ։ Այնտեղ ապրում է 110 վագր, որոնք փրկվել են հեղեղումների ժամանակ։

Բաժանորդագրվեք Top-News.am-ին Telegram-ում