Բրիտանուհին ձերբակալվել է ամուսնու նկատմամբ տունը մաքրելու համար «ճնշումներ» գործադրելու մեղադրանքով

ԱՄՆ-ում 58-ամյա Վալերի Սանդերսն իր ամուսնուն՝ Մայքլին «վերահսկելու» և նրա վրա տունը մաքրելու առումով «ճնշումներ գործադրելու» համար ձերբակալվել է, գրում է The Sun-ը:

Անցած տարվա գարնանը Մայքլի աշխատավայրում պարբերաբար ստուգումներ անցկացնող աշխատակիցները նկատել են, որ նա վատ տրամադրություն ունի: Մայքլը խոստովանել է, որ պատճառը կինն է. վերջինս մշտապես խնդրում է նրան մաքրել տունը և քիչ ժամանակ անցկացնել մարզասրահում: Այս ամենը որակվել է որպես հոգեբանական ճնշում, ինչը քրեորեն պատժելի է, և արդյունքում Վալերին հայտնվել է բանտում:

«Ինձ տարան տեղամաս ու փակեցին խցում: Ես սարսափած էի, երբեք օրենքի հետ խնդիրներ չեմ ունեցել… Ես միայն նրա համար երկտողեր էի թողնում՝ խնդրելով փոշեկուլով մաքրել տունը, քանի որ երկու շուն ունենք, մինչդեռ ինքը ժամերով մաքրում է իր ավտոմեքենան: Ես, բնականաբար, բողոքում էի, բայց դա վերահսկել չէ, հակառակ դեպքում բոլոր ամուսնացած զույգերը դատարանում կհայտնվեին»,- ասել է կինը, որը ստիպված է եղել 17 ժամ բանտախցում մնալ, այնուհետև մոտ մեկ տարի դատական քաշքշուկների մեջ է եղել:

Ամուսինն իր հերթին խոստովանել է, որ կնոջ մշտական հորդորներն ու բողոքներն ազդել են իր տրամադրության վրա, և որ նա իրեն ավելի քիչ ուշադրություն է հատկացրել, քան երկու շներին:

Հայտնի է, որ զույգը ծանոթացել է 2012թ.-ին՝ համացանցով, և երկու տարի անց ամուսնացել է, սակայն այժմ նրանք ամուսնալուծվում են: Վալերիի խոսքով՝ բանտում անցկացրած 17 ժամը սպանել է ամուսնու նկատմամբ իր սերը: Դատարանը նրան 2 տարով արգելել է մոտենալ Մայքլին, սակայն նա առանց այդ էլ նման մտադրություն չունի: Ինչ վերաբերում է տղամարդուն՝ նա շարունակում է զբաղվել բոդիբիլդինգով:

Բաժանորդագրվեք Top-News.am-ին Telegram-ում