«Հաջորդ շաբաթվանից կսկսվի միլիոնավոր ապօրինի ներգաղթյալներին հետ ուղարկելու գործընթացը». Թրամփ

Միացյալ Նահանգների նախագահ Դոնալդ Թրամփը, որը միգրացիոն կոշտ քաղաքականության կողմնակից է, իր պաշտոնական թվիթերյան միկրոբլոգում տեղեկացրել է, որ հաջորդ շաբաթվանից սկսած ամերիկյան իշխանությունները կսկսեն միլիոնավոր ապօրինի ներգաղթյալներին հետ ուղարկելու գործընթացը:

«Հաջորդ շաբաթվանից սկսած ԱՄՆ միգրացիոն և մաքսային ոստիկանությունը կսկսի զարտուղի ճանապարհով Միացյալ Նահանգներում հայտնված միլիոնավոր ապօրինի օտարականներին հետ ուղարկելու գործընթացը»,-գրել է Թրամփը՝ ընդգծելով, որ Մեքսիկայի իշխանությունները, օգտագործելով խիստ միգրացիոն օրենքները, շատ լավ աշխատանք են կատարում ներգաղթյալներին կանգնեցնելու հարցում:

Daily Mail-ը հավելում է, որ ներկայում Միացյալ Նահանգներում կա մոտավորապես 12 մլն ապօրինի ներգաղթյալ՝ հիմնականում Մեքսիկայից և Կենտրոնական Ամերիկայի երկրներից:

Այս ամիս կնքված համաձայնագրի շրջանակում Մեքսիկան համաձայնել է իր տարածքում պահել Կենտրոնական Ամերիկայից եկած այն ներգաղթյալներին, որոնք ցանկանում են ապաստան ստանալ ԱՄՆ-ում: Նրանք այնքան ժամանակ Մեքսիկայում կմնան, քանի դեռ ամերիկյան դատարանները նրանց հարցով որոշումներ չեն կայացրել:

Թրամփը հայտնել է, որ ԱՄՆ-ն պատրաստվում է նմանատիպ համաձայնագիր ստորագրել նաև Գվատեմալայի հետ: