Եթե մենք հեղափոխություն ենք արել, ես իրավունք չունեմ դաշտը հանձնելու. Թատերականի ռեկտորի թեկնածու (տեսանյութ)

Երևանի թատրոնի և կինոյի պետական ինստիտուտի ռեկտորի ժամանակավոր պաշտոնակատար, ռեկտորի թեկնածու Լիլիթ Արզումանյանը ինքնաբացարկ չի հայտնի, չնայած այդ մասին հայտարարել էր մեկ օր առաջ:

«Ինքնաբացարկ չեմ հայտնի, ընտրություն է, թող լինի ընտրություն»,– Tert.am-ի հետ զրույցում ասաց Լիլիթ Արզումանյանը։

Դիտարկմանը, թե ուսանողներին ասել է, որ թող իրենք լեզու գտնեն ԿԳՆ-ի հետ, ինչու է փոխել որոշումը, Լիլիթ Արզումանյանն ասաց.«Ամեն ինչ կատարվել է օրենքի տառին համապատասխան, և ես առիթ չունեմ ինքնաբացարկ հայտնելու»:

Նա նաև ասաց, որ ինքն այն մարդն է, որն իր կենսագրությամբ ու վաստակով պետք է զբաղվի երիտասարդության դաստիարակությամբ.«Ինքնաբացարկ չեմ հայտնի, ես մտածեցի, որ եթե մենք հեղափոխություն ենք արել, ես իրավունք չունեմ դաշտը հանձնելու»:

Դիտարկմանը, թե ուսանողական խորհուրդը հայտարարություն է տարածել, որ ժամանակավոր պաշտոնավարման վեց ամսվա ընթացքում բուհում կառուցողական գործունեություն չի կատարվել և իրենք այլընտրանքային թեկնածու են ուզում տեսնել և այլընտրանքային ծրագրեր, Լիլիթ Արզումանյանն ասաց.«Որ չկա այլընտրանքային թեկնածու, ո՞վ Է մեղավոր»:

Ինչ վերաբերում է իր ծրագրերին, Լիլիթ Արզումանյանն ասաց, որ բուհում արմատական փոփոխություններ են լինելու դասավանդման գործընթացում, ինչի մասին խոստացավ հետո ավելի մանրամասն հայտնել:

Լիլիթ Արզումանյանը 2018-ի իշխանափոխությունից առաջ զբաղեցնում էր ԲՈՀ-ի նախագահի պաշտոնը:

Առավել մանրամասն՝ տեսանյութում: