Ռոբերտ Քոչարյանի գործով դատավորը բարձրացրել է 300.1 հոդվածի սահմանադրականության հարցը

«Որոշումը նոր եմ ստացել դատարանի կողմից, հիմքերին հանգամանորեն դեռ չեմ հասցրել ծանոթանալ, բայց թռուցիկ նայելով` կարող եմ ասել, որ խոսքը վերաբերում է 300.1 հոդվածի սահմանադրականությանը»,-այս մասին «Փաստինֆո»-ի հետ զրույցում ասաց Արմեն Գևորգյանի պաշտպան Էրիկ Ալեքսանյանը` անդրադառնալով դատարանի կողմից Ռոբերտ Քոչարյանի եւ 3 այլ բարձրաստիճան պաշտոնատար անձանց վերաբերյալ գործի կասեցմանը։

Նրա խոսքով` այն հոդվածով, որով մեղադրանք է առաջադրվել, դատարանը գտել է, որ սահմանադրականության հարց կա, որի լուծում է պետք է տա ՍԴ-ն. «Այդ մեկնաբանությանը միանշանակ համակարծիք ենք, որովհետեւ քննության սկզբնական փուլից մենք` պաշտպաններս, ուղղակի գոռում ենք դրա մասին` ասելով, որ այս հոդվածը անորոշ է, իսկ անձին այն հոդվածով, որը որ որոշակիության խնդիր ունի, չի կարելի ենթարկել քրեական պատասպանատվության։

Ռոբերտ Քոչարյանի գործով դատարանը վարույթը կասեցրել է. գործը տեղափոխվում է ՍԴ

Պաշտպանը նշեց, որ 2008 թվականին այդ հոդվածը կոչվում էր «Իշխանության յուրացումը», և դրա դիսպոզիցիայի մեջ մտնում էր սահմանադրական կարգի տապալման գործողությունը` ի թիվս այլ գործողությունների.

«Սակայն 2009 թվականին այս հոդվածը լրացվեց և սկսեց կոչվել «Սահմանադրական կարգի տապալումը»։ Ի՞նչ է տեղի ունենում. օրենսդիրը վերցրել է հին հոդվածի դիսպոզիցիայի գործողություններից մեկը` սահմանադրական կարգի տապալումը, և նոր օրենքով դարձրել է առանձին հանցակազմ, սակայն դրանք նույնը չեն, որովհետև իշխանության յուրացման հոդվածի նպատակը հենց իշխանության յուրացումն էր: Այսինքն` դրա մեջ մտնող սահմանադրական կարգի տապալման նպատակը ևս իշխանության յուրացումն էր, իսկ նոր հոդվածով սահմանադրական կարգի տապալումը նման նպատակ չի հետապնդում»։

Էրիկ Ալեքսանյանը պնդեց, որ այս հոդվածներն իրարից էապես տարբերվում են. «Ավելին ասեմ, 2008 թվականից հետո Դատախազությունը սահմանադրական կարգի տապալման այս նոր հոդվածով որոշ անձանց մեղադրանք չի առաջադրել և առաջադրել է 205-րդով` նշելով, որ այս նոր լրացված հոդվածն ավելի խստացնող է: Նույն տրամաբանությամբ շարժվելով` երբ հարցնում ենք, թե ինչու են այս մարդկանց մեղադրանք առաջադրում, Դատախազությունը պատասխանում է, որ իրավական պրակտիկան զարգանում է, և մեր դիրքորոշումները փոխվում են: Բայց ես չեմ հավատում, թե մեր դատախազությունն այնքան արհեստավարժ չէ, որ նման կիքսեր թույլ տա»,- «Փաստինֆո»-ին հայտնեց պաշտպան Էրիկ Ալեքսանյանը։

Ավելի վաղ տեղեկացրել ենք, որ Ռոբերտ Քոչարյանը մեղադրվում է ՀՀ քրեական օրենսգրքի 300.1-րդ հոդվածի 1-ին մասով և 311-րդ հոդվածի 4-րդ մասի 2-րդ կետով` ՀՀ սահմանադրական կարգը տապալելու և առանձնապես խոշոր չափերով կաշառք ստանալու մեջ, Սեյրան Օհանյանը մեղադրվում է ՀՀ քրեական օրենսգրքի 300.1-րդ հոդվածի 1-ին մասով` ՀՀ սահմանադրական կարգը տապալելու մեջ, Յուրի Խաչատուրովը մեղադրվում է ՀՀ քրեական օրենսգրքի 300.1-րդ հոդվածի 1-ին մասով` ՀՀ սահմանադրական կարգը տապալելու մեջ, Արմեն Գևորգյանը մեղադրվում է ՀՀ քրեական օրենսգրքի 38-300.1-րդ հոդվածի 1-ին մասով, 311-րդ հոդվածի 4-րդ մասի 2-րդ կետով և 190-րդ հոդվածի 3-րդ մասի 1-ին կետով` ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ: