Դատարանի աշխատանքը կազմալուծելն անընդունելի է. դատավոր Դավիթ Բալայանի արձագանքը՝ Փաշինյանի կոչին

Իշխանություններն իրենց գործողություններով կազմալուծում են դատարանի աշխատանքն, ինչն անընդունելի է։ Այս մասին NEWS.am–ի հետ զրույցում հայտնեց Երևանի ընդհանուր իրավասության դատարանի Շենգավիթի նստավայրի դատավոր Դավիթ Բալայանը՝ արձագանքելով Հայաստանի դատարանների ելքերն ու մուտքերն արգելափակելու վարչապետ Նիկոլ Փաշինյանի կոչին։

Դավիթ Բալայանը տեղեկացրեց, որ առավոտյան սովորականի պես գնալու է աշխատանքի և, եթե դատարանի մուտքն արգելափակված լինի, փորձելու է ներս մտնել։

«Իրենց գործողություններով կազմալուծում են դատարանի աշխատանքը , ինչն անընդունելի է»,–ասաց նա։

Հիշեցնենք, որ այսօր՝ մայիսի 19-ին, վարչապետ Նիկոլ Փաշինյանը ֆեյսբուքյան իր էջում գրել է. «Առավոտյան ժամը 08.30-ից արգելափակում ենք հանրապետության՝ առանց բացառության բոլոր դատարանների ելքերն ու մուտքերը, այնպես, որ ոչ ոք ներս չմտնի»։ Նշենք, որ այս մասին Նիկոլ Փաշինյանը ֆեյսբուքյան չորրորդ գրառումն է արել, մինչ այդ նա գրել էր, որ վաղը կհայտարարի հեղափոխության երկրորդ փուլի մեկնարկը, ավելի վաղ խոստացել էր, որ վաղը հանդես կգա հայտարարությամբ՝ «դատաիրավական համակարգում ժողովրդի իշխանությունը հաստատելու մասին»։ Սրան էլ նախորդել էր մեկ այլ գրառում՝ «Էն մյուս հարցերի մասին վաղը կխոսենք, ժողովուրդ ջան: Կարեւորը դուխներդ չգցեք: Ձեր դեմ խաղ չկա: Ժողովրդի դեմ խաղ չկա»։