«Աննախադեպ դատավարություն»․ Deutsche Welle-ն և «Ֆրանս պրես»-ը՝ Քոչարյանի գործի մասին

Միջագային մամուլը շարունակում է ուշադրության կենտրոնում պահել ՀՀ երկրորդ նախագահ Ռոբերտ Քոչարյանի դեմ գործը։

Մարտի մեկի գործով զարգացումներին անդրադարձել է նաև գերմանական Deutsche Welle հեռուստառադիոընկերությունը։ «Աննախադեպ դատավարություն․ Հայաստանում դատում են նախկին նախագահին» վերնագրով հոդվածում լրատվամիջոցը նշում է, որ Ռոբերտ Քոչարյանի դեմ գործով նիստին դատարանի դահլիճը լեփ-լեցուն էր։

«Հավաքվածների նշանակալի մասը նախկին նախագահին ողջունում էր «Ազատություն» բացականչություններով։ Քոչարյանի մի քանի տասնյակ աջակիցներ էլ դատարանի բակում էին՝ նախկին նախագահին կալանքից ազատելու պահանջով»,-գրում է Deutsche Welle-ն։

Գործին անդրադարձել է նաև աշխարհի խոշորագույն լրատվական գործակալություններից «Ֆրանս պրես»-ը։ Անդրադառնալով թեմային, հեղինակավոր գործակալությունը նշում է, որ դատավարության օրը Ռոբերտ Քոչարյանի տասնյակ աջակիցներ բողոքի ակցիա են արել, որոնք ուղեկցվել են «Քոչարյանը քաղբանտարկյալ է» և «քաղաքական վենդետտա» գրություններով պաստառներով։

«Մոխրագույն գործնական կոստյում հագած՝ Ռոբերտ Քոչարյանն անխռով տեսք ուներ․ նա ժպտաց իր աջակիցներին, ովքեր «Ազատություն» բացականչեցին»,-գրում է լրատվամիջոցը՝ հավելելով, որ ՀՀ նախկին նախագահը համարում է, որ իր հետ կատարվող գործընթացն ապօրինություն է, և ՀՀ ներկայիս իշխանությունն իրեն մեղավոր է նշանակել, իսկ դատական համակարգն այժմ ծառայում է քաղաքական ղեկավարին։

«Ֆրանս Պրես»-ը հիշեցնում է, որ 2008թ․ Հայաստանում անցկացված նախագահական ընտրություններից հետո լարվածությունը վերածվեց ոստիկանության և ցուցարարների միջև բախումների։ 2009 թվականին ՀՀ ներկայիս վարչապետ Նիկոլ Փաշինյանը ձերբակալվեց 2008 թվականի հետընտրական բողոքի ցույցերը կազմակերպելու համար և դատապարտվեց 7 տարվա ազատազրկման, սակայն 2011 թվականին համաներվեց։

Գործակալությունը մեջբերում է Ռոբերտ Քոչարյանի փաստաբան Հայկ Ալումյանի խոսքերը, ով նշել է, որ մոտակա նպատակը Ռոբերտ Քոչարյանին նախնական կալանքից ազատելն է։ Փաստաբանը հավելել է, որ դատավարությունը կարող է մի քանի տարի տևել։

Գործակալությունը հավելում է․ «Քոչարյանը պնդում է, որ Հայաստանի իշխանությունները ոգևորված չեն՝ պարզելու, թե ում վրա է 10 զոհերի պատասխանատվությունը իշխանության համար անցանկալի փաստերի բացահայտումների վախի պատճառով»։

Աղբյուրը՝ yerevan.today