Դավիթ Սանասարյանն իմ ընկերն էլ է, ու ի՞նչ. Նիկոլ Փաշինյանը` ՊՎԾ պետի քրգործի մասին

ԱԱԾ տնօրեն Արթուր Վանեցյանը դեռ սկզբից, երբ պարզ էր, թե Դավիթ Սանասարյանի գործն ինչ ուղղությամբ է գնում, երկու-երեք անգամ եկել է ինձ մոտ, խնդրել է գործը փոխանցել ՀՔԾ-ին, որովհետև ԱԱԾ-ում էլ նեղվում են այն կասկածներից, որ ոչ օբյեկտիվ գործը կքննվի: Այս մասին իր գործունեության մեկ տարին ամփոփող ասուլիսում հայտարարեց ՀՀ վարչապետ Նիկոլ Փաշինյանը:

«Ես ասել եմ, որ դեմ եմ դրան, որովհետև կստացվի, որ մենք կառավարության ներսում ի վիճակի չենք քննել մեր վերաբերյալ քննվող գործերը: Այսինքն՝ մենք չունենք բավարար քաղաքական կամք, որպեսզի ինքներս մեզ հետ կապված գործերը քննենք և այսպես տալիս ենք ուրիշին և ուրիշն է, որ մեզ հետ կապված քրեական գործերը պետք է քննի»,- ասաց վարչապետը:

Նա հավելեց, որ եթե օբյեկտիվության համար պետք է, որ այդ գործը գնա ՀՔԾ, ինքը բացարձակ խնդիր չի տեսնում այդտեղ: Վարչապետի խոսքով՝ չի կարող այնպես լինել, որ գործը ոչ օբյեկտիվ քննվի:

«Էլի եմ ասում՝ որևէ մեկի անմեղության կանխավարկածը չեմ ուզում խախտել, բայց ես նաև ինձ համար շատ ցավալի արձանագրումներ եմ անում. հեղափոխությունն ինչի՞ համար է եղել ՀՀ-ում, որ մենք մեր ընկերների և ոչ ընկերների նկատմամբ տարբեր վերաբերմունք ունենանք: Հայտնի խոսք կա՝ ընկերներին ամեն ինչ, թշնամիներին օրենք: Որ ասում են՝ Դավիթ Սանասարյանն իմ ընկերն է, Դավիթ Սանասարյանն իմ ընկերն էլ է, ու ի՞նչ: Ես ԱԺ ամբիոնից ասել եմ, որ եթե նույնիսկ իմ ընտանիքի անդամը լինի, ինձ համար որևէ նշանակություն չունի: Հիմա էն տեղն է, որ դա ես պետք է ապացուցե՞մ, թե չապացուցեմ»,- ասաց վարչապետը:

Նիկոլ Փաշինյանն ընդգծեց, որ ՀՀ-ում չի կարող լինել ընկերապետություն, ինչպես չի կարող լինել տարբեր այլ պետություններ: «Չի կարող քննությունը օբյեկտիվ չլինել, եթե պարզվի, որ օբյեկտիվ չէ, դաժան պատժի կենթարկվեն այն մարդիկ, որոնք այդպիսի բան են արել: Իմ՝ գործի վերաբերյալ այս պահին ունեցած տվյալները միակողմանի չեն, իմ աղբյուրը միայն ԱԱԾ-ն չէ, որ ասում են՝ հին քյոհնա ԱԱԾ-ականները խաբում են վարչապետին, իմ աղբյուրը նաև մեր թիմի անդամներ են, իմ աղբյուրը նաև Դավիթ Սանասարյանն է: Ինչի՞ է թվում, որ բոլորն այդ նրբությունները հասկանում են, ես չեմ հասկանում»,- ասաց նա:

Փաշինյանը հավելեց, որ եթե պետք լինի, ԱԱԾ-ում էլ ստուգումներ կլինեն, և ստուգողը ՊՎԾ-ն է լինելու: Նրա խոսքով՝ ՊՎԾ-ն Դավիթ Սանասարյանը չէ, ինչպես ՀՀ կառավարությունը Նիկոլ Փաշինյանը չէ: «Լյուդովիկոսի ժամանակներն անցել են: Գաղտնիք բացեմ՝ ԱԱԾ-ում արդեն մի քանի ամիս ընթանում է ծառայողական քննություն, որովհետև նախորդ իշխանությունները հեղափոխությունից մի քանի ամիս առաջ ԱԱԾ-ում նյութեր են ոչնչացրել: Ես չեմ ուզում ասել, թե ինչ արդյունքի կբերի, ես կարող եմ ասել, որ նախկին իշխանությունները հեռանալուց առաջ նյութեր են ոչնչացրել ԱԱԾ-ում: Ես իրավաբան չեմ, բայց իմ քաղաքական գնահատականն այն է, որ դա հանցագործություն է, դա իրենց սեփականությո՞ւնն էր, որ ոչնչացրել են»,- ասաց նա: