Մերօրյա Ռոբինզոն Կրուզոն. իռլանդացին 2,5 տարի առանց էլեկտրականության ու տեխնոլոգիաների խրճիթում է բնակվել (լուսանկարներ)
Իռլանդացի Մարկ Բոյլն ապրում է մերօրյա Ռոբինզոն Կրուզոյի կյանքով. նա 2016թ.-ի դեկտեմբերից ի վեր հրաժարվել է էլեկտրականությունից, համացանցից, ռադիոյից, հեռախոսից, երաժշտությունից, ժամացույցից և ցանկացած բանից, որը հոսանքով է աշխատում:
Ինչպես նշում է Daily Mail-ը, 38-ամյա Մարկը մոտ 2,5 տարի առաջ ջնջել է սոցկայքերում իր բոլոր էջերը, չեղարկել կրեդիտ քարտը, ազատվել բոլոր տեսակի տեխնիկայից և տեղափոխվել Իռլանդիայի արևմտյան Գոլուեյ քաղաքի մոտ սեփական ձեռքով կառուցած փայտե տնակը, որտեղ պատրաստվում է անցկացնել կյանքի մնացած մասը:
Բոյլը հավեր ու մեղուներ է պահում, հողատարածքի փոքրիկ բանջարանոցում սեփական բանջարեղենն է աճեցնում, որով էլ սնվում է ամբողջ տարին: Նա անգամ հրաժարվել է ատամի մածուկից և լվացքի փոշուց և դրանք փոխարինել է այլընտրանքային բնական, ինքնաշեն տարբերակներով, բացի այդ, նա պնդում է, որ շուրջ 20 տարի բժշկի դիմելու կարիք չի ունեցել:
Չնայած ամենին՝ տղամարդը շարունակում է թուղթ ու գրիչ օգտագործել: Արդեն լույս է տեսել նրա՝ «Տան ճանապարհը. պատմություններ առանց տեխնոլոգիայի կյանքից» վերնագրով գիրքը, որում նա պատմում է իր փորձառության և կենսակերպի մասին:
Հատկանշական է, սակայն, այն, որ տղամարդը նախկինում մի քանի տարի ապրել է առանց գումարի և այնուհետև այդ մասին գիրք գրել, որի վաճառքից ստացված գումարով էլ ձեռք է բերել այն հողատարածքը, որտեղ այժմ բնակվում է:
Երեսունութամյա տղամարդը պատմել է պարբերականի լրագրողին, որ բարձրագույն կրթություն է ստացել, ժամանակին Բրիսթոլում օրգանական սննդի ընկերության մենեջեր է եղել, ինչպես նաև կախվածություն է ունեցել Facebook ու Twitter սոցկայքերից:
«Մեր կենսակերպի՝ կյանքի վրա ունեցած ազդեցությունը դուր չէր գալիս ինձ: Ինդուստրիալիզմը ոչնչացնում է կյանքը երկրի երեսից, օվկիանոսները լի են պլաստիկով, մենք վերջին 50 տարիներին կորցրել ենք վայրի բնության 60%-ը: Ես ուզում էի վերադառնալ այն կյանքին, որը կար մինչ այդ»,- պատմել է Մարկը՝ հավելելով, որ ժամանակակից կյանքի հարմարավետությունները նաև շատ սթրեսի պատճառ են դառնում:
«Ես լսել եմ ինչ-որ «Բրեքզիթ»-ի մասին, բայց ուրախ եմ, որ այդ ամենին մասնակից չեմ», - ասել է տղամարդը՝ հավելելով, որ բնությանը մոտ գտնվելով՝ ներքին խաղաղություն է ձեռք բերել և ավելի շատ է կապվել իրեն շրջապատող մարդկանց հետ:
Տղամարդը խոստովանել է, որ խրճիթի կյանքն իր անհարմարություններն ունի. նա մշտապես կարտոֆիլով և կանաչեղենով է սնվում, կայծքարից կրակ ստանալու համար երկար ժամանակ է ծախսում և, ի լրումն այդ ամենի, ընկերուհին լքել է նրան՝ հայտարարելով, որ նման կյանքն իր համար չէ:
Մարկը նաև պատմել է, որ Դուբլինում բնակվող իր նոր ընկերուհուն սիրային նամակներ է ուղարկում, ինչը, նրա կարծիքով, գերադասելի է բջջային հաղորդագրություններից: Բացի այդ, նա փաբ է հաճախում, որտեղ հանդիպում է ընկերներին, նոր ծանոթություններ հաստատում, իսկ իր հողատարածքում գրեթե միշտ հյուրեր են լինում:
Մարկի խոսքով՝ ինքը բացահայտել է իր կյանքի իմաստը. «Ապրե՛լ: Զգալ կյանքն իր ամբողջ կախարդանքով, քանի որ այն լի է հրաշքներով, սակայն մենք հաճախ չափազանց զբաղված ենք լինում այդ ամենը գնահատելու համար»,- եզրափակել է իռլանդացին:
Հայաստանում կենսաթոշակառուների համար նոր հնարավորություններ են բացվում
Շիրակցի դպրոցականները մեկնել են ամառային հանգստի՝ դեպի «Արագած» ճամբար
Իսպանիայի ընտրանու հարձակվողը վնասվածք ունի
Երևանում մի քանի փողոցներում կփոխվի երթևեկության կազմակերպումը
Անտարկտիդայում հայտնաբերված առաջին դինոզավրի ոսկորը գտել են դարակում
Գալուզինը կասկածի տակ է դնում եվրոպական շուկաների՝ Հայաստանի համար այլընտրանք լինելը
Ոստիկանության գվարդիայի ծառայողներն ու համայնքային ոստիկանները թմրամիջոց պահելու դեպքեր են բացահայտե...
Մեծացել է ռուբլու առքի և վաճառքի տարբերությունը․ ի՞նչ վտանգներ կան բանկային համակարգի համար
Արարատի մարզ Քաղցրաշեն գյուղում կաթնամթերքի արտադրամասի գործունեություն է կասեցվել
Թուրքիան արձագանքել է Իսրայելի կառավարության կողմից Հայոց ցեղասպանությունը ճանաչող բանաձևի հաստատման...