Nissan-ի նախկին ղեկավարը 4,5 մլն դոլար գրավի դիմաց բանտից կրկին ազատ կարձակվի

Ճապոնիայի մայրաքաղաք Տոկիոյի շրջանային դատարանը Nissan, Renault և Mitsubishi ավտոշինական ընկերությունների դաշինքի նախկին տնօրեն Կառլոս Գոնին երկրորդ անգամ գրավի դիմաց ազատ արձակելու որոշում է կայացրել, հաղորդում է CNN հեռուստաընկերությունը:

Գոնի դատապաշտպանները նրա համար շուրջ 4,5 մլն դոլարի չափով գրավ են առաջարկել: Դատարանի որոշման համաձայն՝ Գոնը բանտից ազատ կարձակվի, սակայն տնային կալանքի տակ կմնա, ինչպես նաև նրան կարգելվի լքել երկիրը: Ակնկալվում է, որ ընկերության նախկին ղեկավարը հենց այսօր կարող է ազատ արձակվել բանտից:

Հիշեցնենք, որ 64-ամյա Գոնը և Nissan-ի տնօրենների խորհրդի անդամ Գրեգ Քելլին ձերբակալվել էին 2018թ.-ի նոյեմբերի 19-ին՝ ճապոնական ֆինանսական օրենսդրությունը խախտելու համար: Նախաքննությամբ պարզվել էր, որ հինգ տարվա ընթացքում Գոնը Nissan-ից ստացել է մոտ 10 միլիարդ իեն (գրեթե 89 միլիոն դոլար) եկամուտ, սակայն պետությանը 2 անգամ պակաս հարկ է վճարել:

Մարտի սկզբին նա 9 մլն դոլարի չափով գրավի դիմաց ավելի քան 100 օր բանտում անցկացնելուց հետո ազատ էր արձակվել, սակայն ապրիլի սկզբին կրկին ձերբակալվել էր: Պատճառը դատախազների կասկածներն էին առ այն, որ Գոնը Nissan-ի տնօրեն եղած ժամանակ 2015-2018թթ. ընկերության 5 մլն դոլարի կորստի պատճառ է դարձել: Կասկած կա, որ այդ միջոցներն ուղղվել են ձերբակալվածի անձնական կարիքներին: