Եթե նույնիսկ պարզվեր Փաշինյանի վարորդի մորաքրոջ տղան է, դրա մեջ էլ վատ բան չկա. Դավիթ Անանյան

Մենք մամուլից տեղեկացանք եւ պարզեցինք, որ դա ապատեղեկատվություն է։ Այս մասին այսօր՝ ապրիլի 22-ին, լրագրողների հետ զրույցում ասաց ՊԵԿ նախագահ Դավիթ Անանյանը՝ անդրադառնալով մամուլի այն տեղեկությանը, թե ՀՀ վարչապետ Նիկոլ Փաշինյանն իր վարորդի մորաքրոջ տղային նշանակել է Նորագավիթի մաքսակետի տնօրեն։

«Արյունակցական կապ չունեն էդ մարդիկ, ծանոթ են, այո, որքանով, որ ես գիտեմ, բայց եթե Գեղամ Սարբազյանի մասին է խոսքը, ինքը երկար տարիներ աշխատում է մեր համակարգում, աշխատանքը սկսել է տեսուչից, հասել է մինչեւ հարկային տեսչության պետի տեղակալի պաշտոնի եւ իմ պաշտոնավարման ժամանակ հարկայաինից տեղափոխվել է մաքսային ծառայություն։ Մաքսային ծառայությունում եղել է արեւմտյան մաքսային վարչությունում ուղեւորային սպասարկումների բաժնի պետ, հետո նույն վարչությունում եղել է վարչության պետի տեղակալ, հետո այլ վարչություն է տեղափոխվել որպես պետի տեղակալ։ Սա իր անցած ճանապարհն է»,–նշեց նա։

Դավիթ Անանյանը, սակայն, շեշտեց՝ եթե նույնիսկ պարզվեր Փաշինյանի վարորդի մորաքրոջ տղան է, դրա մեջ էլ վատ բան չկա. «Եթե նույնիսկ պարզվեր վարորդի մորաքրոջ տղան է, դրա մեջ էլ վատ բան չկա, որովհետեւ մենք այնքան փոքր ու այնքան հարազատ ենք։ Օրինակ, եթե լրագրողին աշխատանք առաջարկեմ, հնարավոր է գրեն, որ մենք շատ հին, արյունակցական կապեր ունենք»։