Facebook-ն օգտատերերի տվյալներն օգտագործել է մրցակիցների դեմ պայքարելու համար

Facebook խոշորագույն ընկերությունը օգտատերերի տվյալներն օգտագործել է մրցակիցների դեմ պայքարելու եւ գործընկերներին օգնելու համար՝ հայտնում է NBC News-ը։

Հեռուստաալիքը հասանելիություն է ձեռք բերել համացանց «լցված» 4000 փաստաթղթերին, որոնց թվում են էլեկտրոնային փոստի հաղորդագրություններ, վեբ-չատերի նամակագրություն, շնորհանդեսներ, էլեկտրոնային աղյուսակներ եւ Facebook-ի հանդիպումների արդյունքների տեսագրություններ։ Նշվում է, որ այդ փաստաթղթերի օգնությամբ կարելի է հասկանալ, թե ինչպես է Facebook-ի հիմնադիր Մարկ Ցուկերբերգը տնօրենների եւ մենեջերների հետ օգտագործել սոցցանցի օգտատերերի անձնական տվյալները՝ գործընկերների վրա ազդելու համար։ Հեռուստաալիքը հստակեցնում է, որ Facebook-ը որոշ դեպքերում «պարգեւատրել է» ընկերություններին՝ նրանց տրամադրելով օգտատերերի տվյալների հասանելիություն։

Այսպես, օրինակ, Facebook-ը Amazon-ին տրամադրել է օգտատերերի տվյալների հասանելիությունը, քանի որ վերջինս գումար է ծախսել Facebook-ում գովազդի համար, երբ թողարկում էր սեփական Amazon Fire Phone սմարթֆոնը։

Ըստ փաստաթղթերի, արդյունքում Facebook-ը որոշել է ուղղակիորեն չվաճառել տվյալները, այլ դրանք բաժանել հավելվածներ մշակողներին, որոնք համարվում են Ցուկերբերգի անձնական «ընկերները»։

Facebook-ն իր հերթին հերքում է բոլոր այս մեղադրանքները։ Ընդգծվում է, որ ընկերությանը օրինախախտության մեջ չեն մեղադրել։