«Թուրքիան արդեն ձեռք է բերել ռուսական С-400-ը, գործարքն ավարտված է». Չավուշօղլու

Թուրքիայի արտգործնախարար Մևլութ Չավուշօղլուն, Վաշինգտոնում կայացած մամուլի ասուլիսի ժամանակ անդրադառնալով ռուսական С-400 զենիթահրթիռային համակարգերի գնման գործարքին, նշել է, որ նախկինում Անկարան բազմիցս հայտնել է ԱՄՆ-ին և մյուս գործընկերներին տվյալ գործարքը չեղարկելու անհնարինության մասին, գրում է tass.ru-ն:

«Մենք դեռևս մի քանի ամիս առաջ ենք ասել Միացյալ Նահանգներին և մեր մյուս գործընկերներին, որ С-400-ի հարցով Ռուսաստանի հետ գործարքը չի կարող չեղարկվել: Մենք արդեն ձեռք ենք բերել հակաօդային պաշտպանության համակարգերը, գործարքն ավարտված է»,-ընդգծել է թուրք պաշտոնյան:

Միևնույն ժամանակ Թուրքիայի արտաքին քաղաքական գերատեսչության ղեկավարը հիշեցրել է, որ Անկարան «ստիպված» էր ռուսական զենք գնել, քանի որ չի կարողացել համարժեք համակարգեր գնել իր դաշնակիցներից:

Ըստ Չավուշօղլուի՝ մյուս դաշնակից երկրները Թուրքիային չպետք է թելադրեն, թե որ երկրից ինչ համակարգեր գնի:

Արտգործնախարարն իր խոսքում նաև նշել է, որ Թուրքիա-Ռուսաստան հարաբերությունները ՆԱՏՕ-ի կամ ԵՄ-ի հետ հարաբերություններին այլընտրանք չեն:

Հայտնի է, որ Թուրքիայի կողմից С-400-ի գնումը զգալի լարվածություն է առաջացրել Վաշինգտոնի հետ հարաբերություններում: Օրերս ԱՄՆ-ն հայտարարել է, որ Թուրքիան այլևս չի մասնակցում ամերիկյան F-35 կործանիչների ստեղծման և դրանց գնման ծրագրին, ինչը կապված է ռուսական համակարգերի գնման հետ:

Ինչպես ավելի վաղ հայտնել էր tert.am-ը, Թուրքիայի պաշտպանության նախարար Հուլուսի Աքարը հայտարարել էր, որ С-400 համալիրների ձեռքբերումը ոչ թե նախընտրության, այլ ազգային անվտանգության կենսական պահանջի հարց է:

«Թուրքիան պարտավոր է պաշտպանել իր 82 մլն քաղաքացիներին»,-ասել էր պաշտոնյան:

Մինչդեռ փետրվարին ռուսական «Ռոստեխ» պետական ընկերության ղեկավարը հայտնել էր, որ Թուրքիային ՀՕՊ համակարգերի մատակարարման պայմանագիրն ամբողջությամբ կիրագործվի 2019-ին:

Թուրքիան 4 միավոր С-400 համակարգեր է ձեռք բերել: Գործարքի արժեքը կազմում է 2,5 մլրդ դոլար:

Այս թեմայով Թուրքիա–Հունաստան սահմանին զինված բախում է տեղի ունեցել Թուրքիայի ընդդիմադիր կուսակցապետի նկատմամբ հետաքննություն է սկսվել Թուրքիայում 5․8 մագնիտուդ ուժգնությամբ երկրաշարժ է տեղի ունեցել․ կա 1 զnh և 69 տուժած Զբոսաշրջիկները չեղարկում են դեպի Թուրքիա տուրերը՝ հնարավոր երկրաշարժերի պատճառով Անկարան ուշադիր հետևում է Ուկրաինայի բանակցություններին