WikiLeaks-ի հիմնադրին Էկվադորի դեսպանատնից կվտարեն

WikiLeaks-ի հիմնադիր Ջուլիան Ասանժին «մի քանի ժամվա կամ օրվա» ընթացքում Լոնդոնում Էկվադորի դեսպանատնից կվտարեն: Այս մասին նշված է կազմակերպության Twitter-յան էջում, փոխանցում է ՌԲԿ-ն:

WikiLeaks-ը վկայակոչել է Էկվադորում մի բարձրաստիճան պաշտոնյայի: Նրա տեղեկություններով Ասանժի վտարման համար որպես պատճառ կօգտագործվի օֆշորային թղթերի հետ կապված սկանդալը, որն առնչվում է Էկվադորի նախագահ Լենին Մորենոյին:

WikiLeaks-ի աղբյուրի տեղեկություններվ՝ Էկվադորն արդեն Ասանժի կալանքի հարցով պայմանավորվել է Մեծ Բրիտանիայի հետ: Էկվադորի ԱԳՆ-ն, իր հերթին, այս տեղեկությունն ասեկոսե է անվանել եւ հրաժարվել է այն մեկնաբանել, փոխանցում է El Commercio-ն:

WikiLeaks-ի հիմնադիրը Լոնդոնում Էկվադորի դեսպանատանն է 2012 թվականից: Նա ապաստան էր խնդրել, որպեսզի խուսափի Շվեդիա արտահանձնելուց: Այս երկրում Ասանժին մեղադրել են բռնաբարության, ինչպես նաեւ ոտնձգության եւ սեքսուալ բնույթի գործողությունների հարկադրելու մեջ: WikiLeaks-ի հիմնադիրը նաեւ վախենում է ԱՄՆ արտաքսվելուց, որտեղ նրան սպառնում է մինչեւ 35 տարվա բանտարկություն կամ մահապատիժ Պետքարտուղարության գաղտնի փաստաթղթերը հրապարակելու համար: