Freedom House-ը դատապարտել է Ադրբեջանում քաղակտիվիստների հետապնդումների նոր ալիքը

Միջազգային իրավապաշտպան Freedom House կազմակերպությունը դատապարտել է քաղակտիվիստների եւ ԼԳԲՏ հանրույթի ներկայացուցիչների հետապնդումների նոր ալիքն Ադրբեջանում։

«Freedom House-ը կոչ է անում Ադրբեջանի կառավարությանը դադարեցնել նախկին քաղբանտարկյալների հետապնդումներն ու ահաբեկումները եւ վերջ տալ ԼԳԲՏ հանրույթի կալանումների նոր ալիքին»,- ասել է Freedom House-ում Եվրոպայի եւ Եվրասիայի ծրագրերի տնօրեն Մարկ Բերենդը, տեղեկացնում է contact.az-ը։

«Այդ ձերբակալությունները չեղարկում են բարի կամքը, որն արտահայտվել է նախագահ Իլհամ Ալիեւի կողմից համաներման ակտով, եւ վկայում են այն մասին, որ Ադրբեջանում շարունակվում է ճնշումն ընդդիմության եւ խոսքի ազատության հանդեպ։ Երկրի առավել խոցելի քաղաքացիների ճնշումը գործիք է ընդհանրապես հասարակության հանդեպ հսկման պահպանման»,- ավելացրել է նա։

Կազմակերպության տվյալներով՝ վերջին օրերին Ադրբեջանում կալանվել են ԼԳԲՏ հանրույթի տասնյակ ներկայացուցիչներ, իսկ մի քանի նախկին քաղբանտարկյալներ հարցաքննվել են կամ կալանվել 2019 թվականի մարտի 16-ի համաներմամբ ազատ արձակվելուց երկու շաբաթ անց։

Ապրիլի 1-ի երեկոյան ոստիկանությունը Բաքվում կալանել է ԼԳԲՏ հանրույթի առնվազն 14 ներկայացուցչի, հիմնականում տրանսսեքսուալների։ Տեղեկությունների համաձայն՝ կալանվածները ստիպված են եղել բուժզննում անցնել, մի մարդ մեղադրվել է «աննշան խուլիգանության» մեջ, մյուսները դատապարտվել են 30-օրյա ձերբակալության կամ տուգանվել են։

«Մինորիտար Ադրբեջանը»՝ ԼԳԲՏ տեղի կազմակերպությունը նույնպես տեղեկացրել է, որ ոստիկանությունն ակտիվորեն հետապնդում է տրանսսեքսուալներին ինտերնետի միջոցով։

Բացի այդ, NIDA դեմոկրատական քաղաքացիական շարժման անդամ Բայրամ Մամեդովը ձերբակալվել է համաներումից երկու շաբաթ հետո եւ դատապարտվել 30-օրյա բանտարկության անհնազանդության մեղադրանքով։ Բողոքարկման լսումների ժամանակ Մամեդովն ասել է, որ ենթարկվել է դաժան վերաբերմունքի իշխանությունների կողմից, նրա դեմքին երեւում էին կապտուկներ։

Բացի այդ, քաղբանտարկյալ եւ NIDA-ի ակտիվիստ Գիյաս Իբրահիմովը, որը նույնպես վերջերս էր ազատ արձակվել, բերման է ենթարկվել ոստիկանական բաժանմունք՝ «պրոֆիլակտիկ զրույցի» պատրվակով։ Վերջերս ազատ արձակված մի քանի այլ բանտարկյալներ նույնպես տեղեկացրել են, որ ոստիկանությունն իրենց կանչում է նման պատրվակներով։