ԱՄՆ-ում առգրավվել է 10 մլն դոլարի թմրանյութ, որը գտնվել է Պաբլո Էսկոբարի պատկերով տոպրակներում (լուսանկարներ)

ԱՄՆ-ի հակաթմրանյութային գործակալության աշխատակիցները Նյու Յորքում առգրավել են թմրանյութերի մեծ խմբաքանակ՝ 10 մլն դոլար արժողությամբ: Հատկանշական է, որ հայտնաբերված հերոինն ու ֆենտանիլը լցված են եղել տխրահռչակ թմրաբարոն Պաբլո Էսկոբարի լուսանկարով տոպրակների մեջ:

Ինչպես նշում է Daily Mail-ը, հայտնաբերված ապրանքը կշռել է 35 կգ: Այն եղել է հերոինի և ֆենտանիլի խառնուրդ: Թմրանյութերը հայտնաբերվել են նյույորքյան Հարլեմ թաղամասի տներից մեկի խուզարկության արդյունքում:

Գործակալների պատմելով՝ փաթեթներից որոշների վրա գրված է եղել «Պաբլո», «Էսկոբար»:

Իրավապահները ձերբակալել են երկու տղամարդու, ինչպես նաև առգրավել են 200 000 դոլար կանխիկ գումար, կեղծ անձնագրեր:

Աղբյուրը նշում է, որ կոլումբացի Պաբլո Էսկոբարը, որը ոստիկանական հատուկ գործողության շրջանակում սպանվել է 1993թ., ժամանակին համարվում էր «կոկաինի արքան»: Նրա կյանքի հիման վրա ամերիկյան Netflix հեռուստատեսային ցանցը նկարահանել է «Նարկոները» աղմկահարույց սերիալը: