Երևանում կրակոց է հնչել, 49-ամյա քաղաքացին հրազենային վնասվածքով տեղափոխվել է հիվանդանոց

Երեկ՝ ապրիլի 1-ին, Երևանում կրակոց է հնչել, քաղաքացին հրազենային վնասվածքով տեղափոխվել է «Աստղիկ» ԲԿ: Այս մասին հայտնում են Shamshyan.com-ից:

Ժամը 21։30-ի սահմաններում «Աստղիկ» բժշկական կենտրոնից ոստիկանության Մալաթիայի բաժին ահազանգ է ստացվել, որ «աջ ձեռքի հրազենային վնասվածք» ախտորոշմամբ իրենց մոտ է տեղափոխվել մի քաղաքացի։

Ոստիկանները պարզել են, որ վիրավորը Երևան քաղաքի բնակիչ՝ 49-ամյա Ավետիս Բարսեղյանն է, որը վնասվածքը ստացել է Շահումյան 6-րդ փողոցում։

Մինչ բժիշկները բժշկական օգնություն էին ցուցաբերում վիրավորին, Մալաթիայի ոստիկանները պարզել են, որ Շահումյան 6-րդ փողոցի թիվ 7 տան մոտ վիճաբանություն է տեղի ունեցել Ա. Բարսեղյանի և նույն փողոցի բնակիչ, 49-ամյա Արթուր Ավագյանի միջև, որի ժամանակ էլ վերջինս իր մոտ եղած թմբուկավոր տիպի 9 մմ տրամաչափի ատրճանակից կրակոց է արձակել, ինչի հետևանքով էլ Ա. Բարսեղյանը հրազենային վնասվածք է ստացել։

Ոստիկանների բացատրական աշխատանքների արդյունքում Ա. Ավագյանն ինքնակամ ներկայացել է ոստիկանություն և ներկայացրել նաև հանցագործության գործիք հանդիսացող ատրճանակը։

Փաստի առթիվ ոստիկանության Մալաթիայի բաժնի հետաքննչական բաժանմունքում նյութեր են նախապատրաստվում։

Ա. Ավագյանը ստորագրությամբ բաց է թողնվել։

Կայքի տեղեկություններով՝ Ա. Բարսեղյանն անհատ ձեռներեց է։