ԱՄՆ-ն մտադիր է պահպանել Սիրիայում իր ռազմական ներկայությունը. Չավուշօղլու

ԱՄՆ-ն մտադիր է պահպանել իր ռազմական ներկայությունը Սիրիայում, եթե երկրի հյուսիսում Թուրքիայի սահմանի երկայնքով տարածքները զբաղեցնեն նախագահ Բաշար ալ-Ասադի կառավարական զորքերը: Այդ մասին հայտարարել է Թուրքիայի արտաքին գործերի նախարար Մեւլութ Չավուշօղլուն իր ռուս գործընկեր Սերգեյ Լավրովի հետ բանակցություններից հետո կայացած մամուլի ասուլիսում, հաղորդում է ՏԱՍՍ-ը:

«Սիրիայի հյուսիսում անվտանգության գոտու ստեղծումն անհրաժեշտ է Թուրքիայի ազգային անվտանգության ապահովման համար: Սա չի խախտում հարեւան պետության տարածքային ամբողջականությունը: ԱՄՆ-ն հայտարարել է, որ եթե Ասադի ռեժիմը վերադառնա այնտեղ, նրանք չեն հեռանա Սիրիայից », - ասել է նա:

Չավուշօղլուի խոսքով, «ամերիկյան զորքերի դուրսբերումը Սիրիայից կարեւոր է երկրի եւ ողջ տարածաշրջանի համար»: «Այս կապակցությամբ մենք բանակցություններ ենք վարում այս բոլոր թեմաների շուրջ, ոչ միայն ԱՄՆ-ի հետ, այլեւ հատկապես խորհրդակցում ենք մեր գործընկերների հետ», - հավելել է ԱԳ նախարարը: