ԱՄՆ-ը լրացուցիչ «ինտենսիվ ճնշում» է գործադրել Իրանի վրա

Այս շաբաթ ԱՄՆ-ը լրացուցիչ «ինտենսիվ ճնշում» է գործադրել Իրանի վրա։ Այս մասին լրագրողներին Սինգապուրում ասել է ահաբեկչության եւ ֆինանսական հետախուզության հարցերով ֆինանսների փոխնախարար Սիգալ Մանդելկերը, տեղեկացնում է Reuters-ը։

Նրա խոսքով՝ ԱՄՆ-ը ցանկանում է, որպեսզի Մալայզիան, Սինգապուրը եւ մյուս երկրները լիովին տեղեկացված լինեն իրանական նավթի ապօրինի մատակարարումների եւ այն մարտավարության մասին, որն Իրանն օգտագործում է պատժամիջոցներից խուսափելու համար։ «Շատ կարեւոր է, որպեսզի այդ երկրները հստակ պատկերացում ունենան տարբեր միջոցների մասին, որոնք կիրառում է իրանական ռեժիմը, որպեսզի խաբի միջազգային հանրությանը նավթի մատակարարումների հարցում»,- ասել է նա։

Մանդելկերն ասել է, որ կընդգծի Իրանի հետ կապված ռիսկերը Մալայզիայի, Սինգապուրի եւ Հնդկաստանի կառավարական պաշտոնյաների հետ առաջիկա հանդիպման ժամանակ։ «Այդ ուղեւորությունը պայմանավորված է հավելյալ ինտենսիվ ճնշմամբ, որը մենք գործադրել ենք Իրանի վրա։ Տառացիորեն անցած շաբաթ մենք միջուկային գիտնականների եւ գործակալությունների դեմ գործողություններ նախաձեռնեցինք՝ կապված Իրանի վարչակազմի միջուկային սպառազինությունների հետ»,- ասել է Մանդելկերը։

Նրա խոսքով՝ այս շաբաթ ձեռնարկվել են միջոցներ պատժամիջոցներից խուսափելու իրանական ցանցի դեմ, որի մեջ են մտնում իրանական, ԱՄԷ եւ Թուրքիայի դրածո ընկերություններ։