Զելենսկին շարունակում է գլխավորել Ուկրաինայում նախագահական մրցապայքարը, երկրորդ տեղում Պորոշենկոն ու Տիմոշենկոն են

Ուկրաինացի շոումեն և հումորիստ Վլադիմիր Զելենսկին շարունակում է գլխավորել Ուկրաինայում նախագահական մրցապայքարը, ըստ վերջին տվյալների՝ նրա օգտին պատրաստ է քվեարկել քաղաքացիների 26,6 տոկոսը: Այս մասին են փաստում «Վարկանիշ» սոցիոլոգիական հետազոտությունների խմբի անցկացրած հարցումների արդյունքները:

Ինչպես գրում է «ՌԻԱ Նովոստի» գործակալությունը, Զելենսկիին հաջորդում են երկրի գործող նախագահ Պյոտր Պորոշենկոն և նախկին վարչապետ, ընդդիմադիր «Հայրենիք» կուսակցության առաջնորդ Յուլյա Տիմոշենկոն, որոնցից յուրաքանչյուրին աջակցում է հարցվածների 17 տոկոսը:

Հայտնի է, որ մյուս թեկնածուների աջակիցները չեն անցնում 10 տոկոսը:

Ավելի վաղ ուկրաինական «Սոցիս» կենտրոնի անցկացրած հարցումները ցույց են տվել, որ Զելենսկիի օգտին պատրաստ է քվեարկել քաղաքացիների 27,7 տոկոսը, Պորոշենկոն, ըստ այդ հարցման, ուներ հարցվածների 19,6 տոկոսի աջակցությունը: Տիմոշենկոյի օգտին քվեարկելու պատրաստակամություն էին հայտնել հարցման մասնակիցների 14,8 տոկոսը:

Հիշեցնենք, որ Ուկրաինայում նախագահական ընտրություններ կանցկացվեն մարտի 31-ին: