Ումն են Հայաստանի տոները

Սովետական մի մուլտֆիլմ կար՝ «Ումն են անտառի կոները» վերնագրով: Հիմա նույնատիպ հարց է հնչում, թե ումն են Հայաստանի տոները, հատկապես՝ Քաղաքացու տոնը:

Բնականաբար, ոմանք կշտապեն ասել, թե բոլորի տոնը: Գուցե նրանք ճիշտ են, բայց քաղաքացին ինչպես իրեն տոն ունեցող զգա, երբ աշխատավարձը կրճատում են, երբ աշխատանքից հեռացնում են, երբ ...

Նիկոլ Փաշինյանը հեղափոխական պայծառ օրերին կառավարության շենքի մոտ կանգնած կոչ էր անում կառավարության աշխատակիցներին չենթարկվել ղեկավարությանը, իսկ հիմա կառավարության եւ նախարարությունների աշխատողները մի պատգամավորի ձեւակերպմամբ դարձան շարիկ գլորողներ:

Հիմա հարց է առաջանում՝ քաղաքացու օրը եւս նրանց տոնն է, թե՞ ոչ: Դժվար է կրճատվող մարդուն համոզել, որ նա տոն ունի, որ նա պետք է ուրախ լինի, որ հանուն երկրի շահերի իրեն կրճատում են:

Կամ եկեք փորձենք գրավատների ու փոխանակման կետերի աշխատողներին, որոնց իշխանությունը առաջարկում է իրենց պետտուրքը ավելացնել 60 անգամ, համոզենք, որ իրենք հիմա տոն ունեն: Մի՞թե նրանք եւս պետք է երջանիկ լինեն, որ մեկ օրում իրենց եկամուտը մոտ հարյուր անգամ կրճատվում է: 

Իսկ ի՞նչ ասենք նրանց, ովքեր գազավորված ըմպելիքներ են արտադրում կամ աշխատում են համալսարաններում եւ շուտով կրճատվելու են:

Մի քանի օր առաջ Երեւանի Վազգեն Սարգսյանի անվան մարզադաշտը լեցուն էր ֆուտբոլասերներով, եւ երբ հաղորդավարը հայտարարեց, թե մարզադաշտում է նաեւ Նիկոլ Փաշինյանը սպասված բուռն բացականչությունները չեղան: Իհարկե, գուցե մարզադաշտի հաղորդավարը սխալ ժամանակ ընտրեց՝ ֆինների վտանգավոր գրոհի պահին, բայց ամեն դեպքում ֆուտբոլասերների ռեակցիան պետք է սթափեցնի, թե Փաշինյանին, թե նրա կառավարությանը:

Իսկ մինչ այդ մենք նորից հարցնում ենք՝ իսկ ումն են Հայաստանի տոները: 

Վարդան Մխիթարյան

Top-News.am