Պորոշենկոն խոստացել է, որ արդեն 2021-2022 թվականներին Ուկրաինան կդադարի գազ ներկրել

Ուկրաինայի նախագահ Պյոտր Պորոշենկոն խոստացել է, որ արդեն 2021-2022 թվականներին երկիրը կդադարի գազ ներկրել, գրում է «ՌԻԱ Նովոստի» գործակալությունը:

Դեռևս հունվարին Պորոշենկոն հայտարարել էր, որ 5 տարվա ընթացքում Ուկրաինան կդառնա էներգետիկ առումով անկախ երկիր: Նրա խոսքով՝ 2017 թվականին Ուկրաինան ներկրել է 14 մլրդ խորանարդ մետր գազ, անցյալ տարի այդ ծավալը նվազել է մինչև 10 մլրդ:

Ուկրաինայում նախագահական ընտրությունները նախատեսված են մարտի 31-ին: Նախագահի պաշտոնի համար կպայքարի 39 թեկնածու:

Հիշեցնենք, որ ավելի քան երկու ամիս նախագահի թեկնածուների վարկանշային աղյուսակը գլխավորում է ուկրաինացի շոումեն և հումորիստ Վլադիմիր Զելենսկին: Նրան հետևում են գործող նախագահ Պորոշենկոն և «Հայրենիք» կուսակցության ղեկավար Յուլյա Տիմոշենկոն: