Թրամփ. «Զեկույցը վերջնական և ամբողջական արդարացում է»

ԱՄՆ արդարադարտության նախարար Ուիլյամ Բարրը Կոնգրեսին հասցեագրված նամակում հայտնել է, որ հատուկ դատախազ Ռոբերտ Մյուլերի՝ 2016 թվականի նախագահական ընտրություններին ռուսների ենթադրյալ միջամտության հարցով հետաքննության զեկույցը ոչ արդարացնում, ոչ էլ դատապարտում է նախագահ Դոնալդ Թրամփին:

Նախարար Բարրն ասել է նաև, որ Մյուլերի հավաքած ապացույցները բավական չեն «արդարադատությունը խոչընդոտելու մեջ նախագահին մեղադրելու համար»:

ԱՄՆ հետաննությունների դաշնային գործակալության նախկին տնօրեն Մյուլերը 22 ամիս առաջ արդարադատության նախարարության հանձնարարությամբ ստանձնել է հատուկ դատախազի լիազորությունները՝ նպատակ ունենալով պարզել, թե արդյո՞ք ապօրինի գործարք է կայացվել 2016 թվականին հանրապետական թեկնածու Թրամփի, նրա թիմակիցների և ռուսների հանդիպումների արդյունքում:

Հետաքննության ընթացքում Մյուլերի քննիչները տարբեր դրվագներով մեղադրանքներ են ներկայացրել ավելի քան երեք տասնյակ ֆիզիկական և իրավաբանական անձանց։ Սակայն այդ մեղադրանքներից և ոչ մեկն ուղղակի առնչություն չունի ռուսների հետ համաձայնության հասնելու մասին Թրամփին և նրա թիմակիցներին վերագրվող գործողությունների հետ:

Ենթադրվում է, որ Մյուլերի վարած հետաքննության շրջանակներում նոր մեղադրանքներ այլևս չեն առաջադրվի:

Սպիտակ տունը, Արդարադատության նախարարությունը և Կոնգրեսը պետք է որոշեն, թե ինչ ծավալով է կարելի հրապարակել զեկույցը:

Հանրապետական և դեմոկրատական մեծ թվով օրենսդիրներ պահանջում են զեկույցը հրապարակել ամբողջությամբ:

Նախագահ Թրամփը զեկույցն անվանել է «ամբողջական և վերջնական արդարացում»: