Վենեսուելան ամերիկացի դիվանագետներին 72 ժամ է տվել երկրից հեռանալու համար

Վենեսուելայի իշխանությունները ԱՄՆ դիվանագետներին 3 օր են տվել լատինաամերիկյան երկրի տարածքը լքելու համար, հայտարարել է Վենեսուելայի ԱԳ նախարար Խորխե Արեասան, փոխանցում է «ՌԻԱ Նովոստի»-ն:

«Ամերիկյան դիվանագիտական անձնակազմը պետք է 72 ժամում լքի Վենեսուելայի տարածքը»,- իր Twitter-յան էջում նշել է Արեասան:

Ավելի վաղ ԱՄՆ պետքարտուղար Մայք Պոնպեոն հայտարարել էր, որ ԱՄՆ-ն մտադիր է Կարակասում մնացած բոլոր դիվանագետներին ընթացիկ շաբաթվա ընթացքում հետ կանչել, քանի որ Վենեսուելայում նրանց ներկայությունը համարում են իրենց քաղաքականությունը զսպող գործոն: Ընդ որում՝ նա չէր հստակեցրել, թե կոնկրետ ինչի մեջ է տեսնում զսպող գործոնը:

Երբ հունվարի 24-ին դեսպանատան անձնակազմի մեծ մասը հետ էր կանչվել, Պոմպեոն հայտարարել էր, որ ԱՄՆ-ն Վենեսուելայի հետ հարաբերությունները չի դադարեցրել, չնայած Վաշինգտոնն այլեւս չի ճանաչում Նիկոլաս Մադուրոյի ղեկավարած իշխանություններին: Նա նաեւ հայտարարել էր, որ Մադուրոն ԱՄՆ-ի համար կորցրել է ամերիկյան դիվանագետական ներկայությունը թույլ տալու կամ արգելելու իրավունքը: ԱՄՆ կողմից ընդդիմության առաջնորդ Խուան Գուայդոյին Վենեսուելայի ղեկավար ճանաչելուց հետո Մադուրոն հայտարարել էր ԱՄՆ-ի հետ դիվանագիտական եւ քաղաքական հարաբերությունների խզման մասին:

Ավելի վաղ ԱՄՆ նախագահի՝ ազգային անվտանգության հարցերով խորհրդական Ջոն Բոլթոնը հայտարարել էր, որ ԱՄՆ-ն ձգտում է կոալիցիա ստեղծել Վենեսուելայում իշխանափոխության համար: Մոսկվան հույս էր հայտնել, որ Վենեսուելա ռազմական ներխուժման հարցում ԱՄՆ-ում կգերիշխի ողջախոհությունը:

Հունվարի 21-ին Վենեսուելայում Մադուրոյի դեմ բողոքի զանգվածային ցույցեր էին սկսվել՝ նրա երդմնակալությունից կարճ ժամանակ անց: Անկարգությունները սկսվելուց հետո ընդդիմության առաջնորդ Խուան Գուայդոն իրեն հռչակել էր պետության ժամանակավոր ղեկավար: ԱՄՆ գլխավորությամբ Արեւմուտքի մի շարք երկրներ հայտարարել էին Գուայդոյին ճանաչելու մասին: Մադուրոն, իր հերթին, խորհրդարանի ղեկավարին անվանել էր ԱՄՆ խամաճիկ: Ռուսաստանը, Չինաստանը եւ մի շարք այլ երկրներ Մադուրոյին աջակցել էին որպես լեգիտիմ նախագահի: