Ռուս պրանկերները Շվեյցարիայի նախագահի անունից բանակցություններ են վարել ԱՄՆ-ի՝ Վենեսուելայի հարցերով հատուկ ներկայացուցչի հետ

Ռուս պրանկերներ Վովանը (Վլադիմիր Կուզնեցով) և Լեքսուսը (Ալեքսեյ Ստոլյարով) Շվեյցարիայի նախագահ Ուլի Մաուրերի անունից բանակցություններ են վարել ԱՄՆ-ի՝ Վենեսուելայի հարցերով հատուկ ներկայացուցիչ Էլիոթ Աբրամսի հետ, գրում է РИА Новости-ն՝ «Россия 24» հեռուստաալիքին հղումով:

Պրանկերները հայտնել են Աբրամսին մտացածին «Լիմպոպո» բանկում Վենեսուելայի ունեցած հաշիվների մասին և պարզել Վաշինգտոնի՝ Կարակասի վերաբերյալ ծրագրերը: Վովանը և Լեքսուսը երկխոսության մանրամասները փոխանցել են Sputnik Mundo գործակալությանը:

Զրույցը տեղի է ունեցել փետրվարի 19-ին: Պրանկերները հայտնել են Աբրամսին, որ շվեյցարական կողմը երկրի բանկերում Վենեսուելայի նախագահ Նիկոլաս Մադուրոյի մտերիմների, ինչպես նաև վենեսուելական ընկերությունների հաշիվների առկայության մեջ ոչ մի օրենքի խախտում չի տեսնում:

Ի պատասխան՝ ԱՄՆ հատուկ ներկայացուցիչը, պրանկերների խոսքով, հայտարարել է, որ տվյալ հաշիվները պետք է ամբողջությամբ սառեցվեն, ընդ որում՝ դրանց ապօրինի լինելու վերաբերյալ ոչ մի ապացույց չի ներկայացրել:

Աբրամսն ընդգծել է, որ եթե Շվեյցարիան Վենեսուելայի ինքնահռչակ նախագահ Խուան Գուաիդոյի՝ վերջնականապես իշխանության գալուց հետո չսառեցնի հաշիվները և «Մադուրոյի փողերը գնան այդ երկրից», Միացյալ Նահանգները կարող է Բեռնի դեմ դատական հայց ներկայացնել:

«Մաուրերը» Աբրամսի ճնշումների ներքո հայտարարել է, որ պատրաստ է հաշիվները սառեցնել, եթե ԱՄՆ-ն համապատասխան փաստաթղթեր ուղարկի, ինչպես նաև խնդրել է օգնել կապ հաստատել Գուաիդոյի հետ, ինչն էլ հատուկ ներկայացուցիչը խոստացել է անել:

Խոսակցությունից հետո ԱՄՆ հատուկ ներկայացուցիչը «Մաուրերին» ամերիկյան պատժամիջեցների ցանկ է ուղարկել, որտեղ Վենեսուելայի ավելի քան 100 քաղաքացի է ներառված:

Ավելի ուշ պրանկերների հետ կապ է հաստատել «Վենեսուելայի նոր կառավարության դեսպան» Կառլոս Վեկկոն: Մաուրերի անունից նրանք Աբրամսին ու Վեկկոյին են ուղարկել վենեսուելացի այն պաշտոնյաների ցուցակը, որոնց հաշիվներն իբր հայտնաբերվել և սառեցվել են:

Ցուցակում եղել են նաև օտարերկրյա քաղաքացիներ՝ Քսենյա Սոբչակը, Դմիտրի Բիկովը և Մարկ Ֆեյգինը, ինչպես նաև նշվել է Lexus Vovanial Bank Ltd բանկի անունը, որտեղ իբր պահվել են Մադուրոյի գումարները:

Պրանկերների խոսքով՝ Աբրամսը շատ գոհ է մնացել ստացած ցուցակից և կապվել է ԱՄՆ ֆինանսների նախարարի հետ: Վերջինս սկսել է աշխատել փաստաթղթի վրա:

Դեսպանն իր հերթին խոստացել է «ամեն ինչ գաղտնի պահել» և հետաքրքրվել է, թե երբ իրենց կողմը կկարողանա «արգելափակված հաշիվների նկատմամբ վերահսկողություն ստանալ», և թե արդյոք նրանք գտել են Մադուրոյի՝ Շվեյցարիայում ունեցած անձնական հաշիվները:

Վովանն ու Լեքսուսը հայտնել են NurlanBaidilda Ltd հիմնադրամի մասին, որտեղ պահվում են Մադուրոյի անձնական ակտիվները, սակայն հավելել են, որ իրավաբանական նրբությունների պատճառով չեն կարող արգելափակել հիմնադրամի հաշիվները:

Պրանկերները հայտնել են Վեկկոյին, որ եթե իրավիճակի մասին հայտնի դառնա, հիմնադրամը կփորձի բոլոր ակտիվները հանել Շվեյցարիայից, ինչն էլ փողերի լվացման կասկածանքի հիմք կծառայի:

Վեկկոն համաձայնել է տարածել այդ տեղեկատվությունը: նա Bloomberg գործակալությանն այդ առնչությամբ հարցազրույց է տվել, ինչպես նաև Թվիթերում այդ մասին գրառում կատարել:

Մարտին պրանկերները, իրենց խոսքով, ևս մեկ հեռախոսազրույց են ունեցել Աբրամսի հետ, որի ժամանակ հայտնել են Վենեսուելայի հարցով ՄԱԿ-ի Անվտանգության խորհրդի վերջին նիստի մասին, ինչպես նաև փորձել պարզել՝ արդյոք ԱՄՆ-ն պատրաստվում է միջամտել Վենեսուելայի ճգնաժամին:

Խոսակցության վերջում Աբրամսը հասկացրել է զրուցակցին, որ ԱՄՆ-ն չի պատրաստվում զորք մտցնել Վենեսուելա: