Լուկաշենկոն պատմել է՝ ինչու ժամանակին չի աջակցել դաշնակից Ռուսաստանին

Բելառուսի նախագահ Ալեքսանդր Լուկաշենկոն «Մեծ խոսակցություն նախագահի հետ» միջոցառման շրջանակում հանդիպել է հանրության և լրատվամիջոցների ներկայացուցիչների հետ ու պատասխանել նրանց հուզող հարցերին:

Անդրադառնալով Աբխազիայի անկախության ճանաչման թեմային՝ Լուկաշենկոն խոստովանել է, որ պատրաստ էր համապատասխան հրամանագիրը ստորագրել, սակայն մտափոխվել է ռուսական կողմի դիրքորոշման պատճառով, գրում է belaruspartisan.by կայքը:

«Ես պատրաստ էի երեկոյան ստորագրել Աբխազիայի անկախության ճանաչման հրամանագիրը: Համենայն դեպս, ռուսներին այսպես ասացի. «Դե՛, եկեք, բայց վաղն ի՞նչ է լինելու: Ինձ այդ մասին նախազգուշացրել էր ՆԱՏՕ-ի նախկին գլխավոր քարտուղար Խավյեր Սոլանան: Նա երեկոյան եկավ ինձ՝ բռնապետիս մոտ ու ասաց. «Եթե ճանաչեք Աբխազիայի անկախությունը, առաջին հերթին մենք ձեզ կանջատենք SWIFT բանկային համակարգից: Դուք կհայտնվեք ամբողջական մեկուսացման մեջ»: Նա ինձ ամեն ինչ ազնիվ ու բացեիբաց ներկայացրեց»,-նշել է Լուկաշենկոն:

Նա պատմել է, որ Սոլանայի հետ զրույցից հետո խոսել է ՌԴ այն ժամանակվա նախագահ Դմիտրի Մեդվեդևի հետ:

«Ես նրան ասում եմ. «Որպես դաշնակից՝ պետք է ձեզ աջակցեմ, սակայն Դմիտրի Անատոլևիչ…» ու պատմեցի նրան: Եվ գիտե՞ք, թե նա ինձ ինչ ասաց. «Ալեքսանդր Գրիգորևիչ, դե Դուք հասկանում եք՝ ես նախագահ եմ, իսկ այս հարցում տնտեսությանն առնչվող բազում հարցեր կան: Դա իմ լիազորությունների շրջանակում չէ, այդ հարցով Վլադիմիր Վլադիմիրովիչին՝ վարչապետին դիմեք, դա նրա հետ է պետք լուծել»: Ես բարկացա, ասացի. «Ես նախագահ եմ, դուք էլ եք նախագահ: Դուք ինձ հարց եք տվել, ես Ձեզ պատասխանում եմ: Եթե չեք կարող այս հարցին լուծում տալ, ուղարկում եք վարչապետի մոտ, ուրեմն էլ ինչի՞ մասին Ձեզ հետ խոսեմ»: