ԱՄՆ-ի անոմալ ցրտի յուրօրինակ հետևանքները՝ Daily Mail-ի ֆոտոշարքում

Բրիտանական Daily Mail պարբերականն ուշագրավ ֆոտոշարքով անդրադարձել է Արկտիկական շրջանից Միացյալ Նահանգների միջին արևմուտք եկած սաստիկ ցուրտ եղանակին, մասնավորապես՝ դրա յուրօրինակ հետևանքներին:

Ստորև ներկայացված ֆոտոշարքում շարքային ամերիկացիները ցույց են տալիս, թե ինչ կարող է պատահել -30 կամ -40 ցրտի պայմաններում:

Խոսքն ամբողջովին սառցապատ զուգարանակոնքերի, ցրտից սառած ու ինքնուրույն «կանգնող» հագուստի, դրսում քարացած թաց մազերի ու այլ ուշագրավ երևույթների մասին է:

Հայտնի է, որ սաստիկ ցուրտը, որը խառնաշփոթ է առաջացրել տասնյակ միլիոնավոր ամերիկացիների առօրյայում, դարձել է առնվազն 21 մարդու մահվան պատճառ:

Դեռ երեկ զոհերի թիվը 12-ն էր, սակայն մեկ օրում ցուցանիշն ավելացել է 9-ով: Հայտնի է, որ բոլոր ինը զոհերը գրանցվել են այս օրերին անոմալ ցրտի կիզակետում գտնվող Չիկագո քաղաքում: Այստեղ օդի ջերմաստիճանը հասել է, ըստ Ցելսիուսի սանդղակի, -49-ի:

Բազմաթիվ քաղաքներում չեղարկվել են հազարավոր չվերթներ, փակվել են դպրոցներ, գործարաններ, դադարեցվել է փոստային ծառայությունների աշխատանքը:

Օդերևութաբանների փոխանցմամբ՝ վերջին անգամ ԱՄՆ-ում այսպիսի ցուրտ եղանակ է եղել ավելի քան 20 տարի առաջ: Հայտնի է, որ երկրի միջին արևմուտքում գտնվող 30 բնակավայրում ցրտի նոր ռեկորդներ են գրանցվել: