Տղամարդը շանտաժի է ենթարկել սիրուհուն ու գումար շորթել

Երևանցի տղամարդը սիրային հարաբերությունների մեջ է մտել ամուսնացած կնոջ հետ, ապա սկսել նրան շանտաժի ենթարկել։ Զույգը պարբերաբար զբաղվել է սեռական հարաբերությամբ ու տղամարդը, գիտակցելով, որ իրենց հարաբերությունների վերաբերյալ տեղեկություններն արատավորում են կնոջը, դրանք հրապարակելու սպառնալիքով սկսել է գումար պահանջել։

Մասնավորապես՝ սպառնացել է իրենց սիրային կապի մասին հայտնել կնոջ ամուսնուն և ընտանիքի անդամներին, որի շնորհիվ 2018թ. փետրվարի 11-ից մինչև օգոստոսի 23-ն ընկած ժամանակահատվածում պահանջել և մաս-մաս ստացել ընդհանուր խոշոր չափերի` 1.140.933 ՀՀ դրամ գումար:

«Փաստինֆո»-ն տեղեկացավ, որ տղամարդուն մեղադրանք է առաջադրվել ՀՀ քրեական օրենսգրքի 182-րդ հոդվածի 2-րդ մասի 3.1 կետով։ Նրա նկատմամբ որպես խափանման միջոց է ընտրվել ստորագրություն՝ չհեռանալու մասին։

Քրեական գործը՝ մեղադրական եզրակացությամբ, ուղարկվել է դատարան և մակագրվել դատավոր Արթուր Մկրտչյանին։