Կարող են լինել որոշակի քաղաքական պայմանավորվածություններ. Տոնոյանը՝ ՀԱՊԿ գլխավոր քարտուղարի պաշտոնի մասին

ՀԱՊԿ գլխավոր քարտուղարի պաշտոնը մինչեւ 2020 թվականը Հայաստանինն է։ Այս մասին այսօր՝ նոյեմբերի 6-ին, լրագրողների հետ զրույցում ասաց ՀՀ պաշտպանության նախարարի պաշտոնակատար Դավիթ Տոնոյանը։

«ՀԱՊԿ գլխավոր քարտուղարի պաշտոնը մինչեւ 2020 թվականը Հայաստանինն է, որոշումը կկայացվի, երկու օրվա ընթացքում պարզ կլինի»,–նշեց նա։

Հարցին՝ հնարավոր է որոշումը հօգուտ մեզ չկայացվի, Տոնոյանը նկատեց. «Ես այդպես չէի ձեւակերպի «հօգուտ» ինչ–որ մեկի։ Կա նորմատիվ կարգավորում ՀԱՊԿ–ում, պետք է որոշում կայացվի երկրի ղեկավարների կողմից։ Այս փուլում մեր հերթն է»,–հավելեց նա։

Հարցին՝ հնարավոր է, այնուամենայնիվ, գլխավոր քարտուղարի պաշտոնում նշանակվի Բելառուսի ներկայացուցիչը, եւ դա արդյոք կհամարվի դիվանագիտական ձախողում, որին ի պատասխան Տոնոյանը նշեց, որ կարող են լինել քաղաքական պայմանավորվածություններ, որոնց մասին ինքը տեղյակ չէ։ «Կարող են լինել որոշակի քաղաքական պայմանավորվածություններ որոնց վերաբերյալ ես ուղղակի տեղյակ չեմ։ Սակայն իմ սկզբունքային մոտեցումն է, որ ՀՀ–ն պետք է շարունակի պաշտոնավարումը»–եզրափակեց նա։

Հիշեցնենք, որ Հայաստանը հետ է կանչել Յուրի Խաչատուրովին ՀԱՊԿ գլխավոր քարտուղարի պաշտոնից։