ՀԱՊԿ նոր գլխավոր քարտուղարի անունը հնարավոր է հնչեցվի նոյեմբերի 8-ին

Հավաքական անվտանգության պայմանագրի կազմակերպության գլխավոր քարտուղարի պաշտոնից Յուրի Խաչատուրովի հրաժարականը կապված է Հայաստանի կողմից նրա հետկանչման հետ: Այս մասին Tert.am-ի հետ զրույցում ասաց ՀԱՊԿ գլխավոր քարտուղարի ժամանակավոր պաշտոնակատար Վալերի Սեմերիկովը:

«ՀԱՊԿ-ի պաշտոնական կայքում տեղադրված է ողջ ինֆորմացիան»,- ասաց նա:

Հարցին՝ «ինչո՞ւ Խաչատուրովը հրաժարական տվեց, Ձեզ համար հասկանալի՞ են պատճառները», Վալերի Սեմերիկովը պատասխանեց.

«Դա Հայաստանի որոշելիքն էր: Մենք ղեկավարվում ենք պաշտոնական փաստաթղթերով: Մեզ մեկ փաստաթուղթ է ներկայացված՝ հայկական կողմի նախաձեռնությամբ Յուրի Խաչատուրովի լիազորությունների դադարեցման մասին, և վերջ: Մնացած հարցերը ճիշտ կլինի ուղղեք Հայաստանի ղեկավարությանը, որը կայացրել է որոշումը»:

Վ. Սեմերիկովը դժվարացավ ասել՝ արդյոք նոր քարտուղարի անունը կհնչեցվի՞ նոյեմբերի 8-ին Աստանայում տեղի ունենալիք գագաթնաժողովի ընթացքում, թե՞ ոչ:

«Օրակարգում այդ հարցը չկա, բայց ես չեմ բացառում, որ այն կարող է քննարկվել Աստանայում: Օրակարգում առայժմ չկա այդ հարցը, բայց ես չեմ բացառում»,- նշեց ՀԱՊԿ գլխավոր քարտուղարի ժամանակավոր պաշտոնակատարը:

Հիշեցնենք, որ Յուրի Խաչատուրովն ազատվել է Հավաքական անվտանգության պայմանագրի կազմակերպության գլխավոր քարտուղարի պաշտոնից: ՀԱՊԿ գլխավոր քարտուղարի պարտականությունների կատարումը դրվել է կազմակերպության գլխավոր քարտուղարի տեղակալ Վալերի Սեմերիկովի վրա: