Աշխատանքներ են տարվում, որ ընտրություններին տեսախցիկներ գործեն. ԿԸՀ նախագահ

Աշխատանքներ են տարվում, որ դեկտեմբերի 9–ին կայանալիք արտահերթ խորհրդարանական ընտրությունների ժամանակ տեղամասային ընտրական հանձնաժողովներում գործեն տեսախցիկներ։ Այս մասին այսօր՝ նոյեմբերի 2–ին, լրագրողների հետ զրույցում ասաց Կենտրոնական ընտրական հանձնաժողովի նախագահ Տիգրան Մուկուչյանը։

«Տեսախցիկների տեղադրումը Կենտրոնական ընտրական հանձնաժողովի գործառույթը չէ, սակայն, աշխատանքներ տարվում են, որ տեղամասային ընտրական հանձնաժողովներում գործեն տեսախցիկներ»,– ասաց նա։

Տիգրան Մուկուչյանը հայտնեց, որ քվեարկությունն իրականացվելու է նույն եղանակով, ինչ 2017թ.–ի ապրիլի 2–ին կայացած Ազգային ժողովի հերթական ընտրությունները։

Նշենք, որ նոյեմբերի 1–ին Ազգային ժողովն իրավունքի ուժով ազատ է արձակվել։ Նախագահի ստորագրած հրամանագրի համաձայն, արտահերթ խորհրդարանական ընտրությունները կանցկացվեն դեկտեմբերի 9–ին։ Նախընտրական քարոզարշավը կմեկնարկի նոյեմբերի 26–ից։