Համատիրությունները իրավունք չունեն նախկին ԲՇՏ-ների պարտքերը պահանջելու

Այսօր դեռևս կան համատիրություններ, ովքեր պահանջում են բնակիչների հին պարտքերը, որոնք կուտակվել են արդեն լուծարված ԲՇՏ-ների (ЖЭК) ժամանակներից:

Araratnews.am-ի հետ զրույցում Երևանի քաղաքապետարանի աշխատակազմի կոմունալ տնտեսության վարչության համատիրությունների հետ աշխատանքի բաժնի պետ Հարություն Խաչատրյանը տեղեկացնում է, որ արդեն լուծարված ԲՇՏ-ների պարտքերը այժմ չեն կարող գանձվել բնակիչներից:

«Այդպես չի լինում, եթե կան նման փաստեր, թող անպայման դիմեն մեզ: ԲՇՏ-ների ժամանակ սեփականության և իրավական դաշտն այլ է եղել, այնտեղ այդպիսի խնդիր չի եղել: Նախկին ԲՇՏ-ներում մենք բոլորս եղել ենք վարձակալներ, պետությունից վարձակալել ենք բնակարանները, իրենք էլ պահպանել են այդ շենքը: Ոչ մի այդպիսի վճարումների մեխանիզմ չկա, որ պահանջ լինի»,- նշեց Խաչատրյանը:

Քաղաքապետարանի ներկայացուցիչը բնակիչներին հորդորում է, որ եթե նման փաստեր կարձանագրվեն, անպայման դիմեն իրենց. «Մենք թեժ գծի զանգերին շատ օպերատիվ արձագանքում ենք և դեռ այդպիսի զանգեր չենք ստացել»:

Մեր զրուցակցի խոսքով՝ համատիրությունը որևէ նման իրավունք չունի, և այդպիսի դեպքերում պետք է ճշտել՝ դա նախկի՞ն ԲՇՏ-ների պարտքերն են, թե՞ համատիրության վերակազմավորման արդյունքում առաջացած պարտքերը: Թե չէ՝ չեն կարող ուզել այդքան վաղեմություն ունեցող պարտքեր:

Հիշեցնենք, որ խնդրին առաջին անգամը չէ, որ անդրադառնում ենք: Նման ահազանգեր եղել են նաև անցյալ տարի, որոնց արձագանքել ենք: Նշենք, որ այս դեպքում ևս գործում է վաղեմության ժամկետի մասին օրենքը, և եթե քաղաքացին պարզում է, որ այն նման հին պարտք է, անկախ բոլոր հանգամանքներից, պետք է գիտակցի, որ եթե գործը գնա դատարան, ինքը կարող է հայցային վաղեմությունը կիրառելու միջնորդություն ներկայացնել:

araratnews.am