ԱՄՆ Պետքարտուղարությունը Ռուսաստանը համեմատել է «ծովային խորությունների հրեշի» հետ

Վաշինգթոնում տեղի է ունեցել ամերկացի եւ ռուսաստանցի դիվանագետների միջեւ հերթական հեռակա «սիրալիրությունների» փոխանակումը. Պետքարտուղարությունում Ռուսաստանը համեմատել են ծովային խորությունների հրեշի հետ, իսկ ԱՄՆ-ում ռուսական դեսպանատանը հիշել են, որ նման մակդիրներից էր օգտվում նացիստական քարոզչությունը, փոխանցում է «ՌԻԱ Նովոստի»-ն:

Ամեն ինչ սկսվել է մակդիրից, որը հերթական ճեպազրույցում Ռուսաստանին պարգեւել է Պետքարտուղարության պաշտոնական ներկայացուցիչ Հեզեր Նաուերթը: «Ասոշիեյթեդ Փրեսի» լրագրող Մեթ Լին նրան հարցրել է՝ արդյոք նոյեմբերին նախատեսված ամերիկյան ընտրություններն ավելի՞ անվտանգ կլինեն ռուսաստանյան 60 դիվանագետներին արտաքսելուց հետո:

«Մենք չենք կարող ասել, որ արդյունքում ԱՄՆ-ում ընտրություններն անվտանգության մեջ կլինեն: Ռուսաստանը երկար ձեռքեր ունի, Ռուսաստանը մեծ թվով շոշափուկներ ունի: Մենք ենթադրում ենք, որ նրանք վերստին հետաքրքրություն կդրսեւորեն մեր ընտրությունների հանդեպ, ինչպես նաեւ շատ այլ երկրների ընտրությունների հանդեպ»,- ասել է Նաուերթը:

Երբ զարմացած լրագրողը հարցրել է «ձեռքերի եւ շոշափուկների» մասին, արտաքին քաղաքականության գերատեսչության ներկայացուցիչը հաաստատել է իր խոսքը եւ հավելել՝ նկատի ունենալով Ռուսաստանը. «Սա ծովային խորությունների հրեշ է»:

Մի քանի ժամ անց ԱՄՆ-ում ՌԴ դեսպանատան Twitter-ի էջում հայտնվել է Նաուերթի խոսքից մեջբերումը, որին կցված էր 1930-ական թվականների նացիստական Գերմանիայի հակաբոլշեւիկյան պաստառ: Դրա վրա պատկերված էր կարմիրբանակայինի սաղավարտով կարմիր սարդ, որը «հեծնել» էր երկրագունդը, եւ մակագրված էր՝ «Բոլշեւիզմ» ու «Մեծ հակաբոլշեւիկյան շոու»:

Ռուսական դեսպանատունն իր կողմից գրել էր. «Այսօր մենք Պետքարտուղարության պաշտոնական ներկայացուցչի կատարմամբ ականատես եղանք «Մեծ հակաբոլշեւիկյան շոուի»: