Ինչ են նշանակում խորհրդային կալանավորների դաջվածքները. The Guardian-ի բացատրությունները ֆոտոշարքով

Բրիտանական The Guardian պարբերականը հրապարակել է ֆոտոշարք, որում ներկայացված են Խորհրդային միության բանտերում պահվող կալանավորներն ու նրանց բազմաթիվ դաջվածքների նշանակությունը:

Հայտնի է, որ լուսանկարներն արվել են 1960-1980-ական թվականներին՝ Արկադի Բրոննիկովի կողմից:

Քրեագիտական փորձագետն այցելել է ԽՍՀՄ տարբեր անկյուններում գտնվող կալանավայրեր՝ փորձելով հասկանալ հանցագործների կողմից այդքան շատ սիրված դաջվածքների լեզուն ու նշանակությունը:

Բզեզի, սարդի կամ ճանճի պատկերը վկայում է, որ տվյալ մարդը կյանքի մեծ մասն անցկացրել է կալանավայրերում: 

Սարդոստայնի մեջ խճճված սարդը նշանակում է, որ տվյալ հանցագործը միայնակ է քայլում հանցավոր ուղիով:

Կանալավորների մոտ ընդունված է դաջվածք անել մարմնի այն հատվածում, որտեղից թմրանյութ է ներարկվում: 

Խաղաքարտեր, դանակ, կին, բանտի ճաղեր, կմախք, գումար: Քրեական աշխարհում սրանք այն տարրերն են, որոնք հանցագործները շատ են սիրում, և որոնց պատճառով էլ կործանում են իրենց կյանքը:

Վագրն ագրեսիայի, հեղինակություն վայելելու հավակնության նշան է: 

Հանցագործների շրջանում ամենաշատ տարածված դաջվածքը խաչված Քրիստոսի պատկերն է, որը խորհրդանշում է հավատ եղբայրության նկատմամբ: 

Սուր ժանիքներով հրեշի պատկերը նշանակում է, որ դաջվածքի տերն «ատամ ունի» ոստիկանների նկատմամբ: Կրակի վրա այրվող կնոջ պատկերով դաջվածքը ցույց է տալիս, որ այն կրողն իր կալանավորման համար մեղադրում է կնոջը: Մինչդեռ վառվող փայտի կտորների քանակը խոսում է ազատազրկման ժամկետի մասին:

Խորհրդային մեդալների պատկերով դաջվածքները վկայում են, որ դրանք կրողը ծաղրում է իշխանություններին: Խաչը ձեռքում պահած աղջկա պատկերը ցույց է տալիս, որ կալանավորը սիրած կին ունի: Դագաղի մոտ կանգնած կնոջ պատկերը վկայում է, որ տվյալ անձն ազատազրկվել է մարդասպանության համար, որի պատճառը եղել է կինը: 

Երկու շղթայված ձեռքերի պատկերը նշականում է, որ տվյալ անձը դատապարտվել է 10 տարվա ազատազրկման: Եթե շղթան կոտրված է, ուրեմն նրան հաջողվել է փախուստի դիմել: 

 Ձեռքին դաջված թևնոցը խորհրդանշում է 5 տարվա ազատազրկում: Մատանու տեսքով դաջվածքները վկայում են, որ տվյալ մարդը հանցավոր ուղու վրա է կանգնել երիտասարդ տարիքից, որ մտադիր է մինչ գերեզման գող մնալ ու հավատում է, որ միայն մահը կարող է ստիպել իրեն փոխվել: Թղթախաղի նշանները վկայում են, որ մարդը խաղամոլ է: