Նոր սահմանափակումներ են առաջարկվում. 70 տարեկանը լրացած մարդկանց կարգելվի շահումով խաղեր խաղալ
Ինչպես նշվում է քննարկման ընթացքում, նախագծերի փաթեթի շուրջ կառավարության և ոլորտի ընկերությունների ներկայացուցիչների հետ կայացած մանրամասն հանդիպումների արդյունքում բերվել է վերջնական կոնսենսուսի, և առաջարկների ու դիտարկումների մասով տարաձայնություններ չկան։
Զեկուցող Հայկ Սարգսյանը հայտնեց, որ նախագծով առաջարկվում է սահմանափակումներ մտցնել, որպեսզի մի շարք քաղաքացիներ և պաշտոն զբաղեցնող անձինք չկարողանան մասնակցել խաղային գործունեությանը՝ խաղալ ինտերնետ շահումով խաղեր կամ վիճակախաղեր։ Առաջինից երկրորդ ընթերցում կատարվել են մի քանի լրացումներ. մասնավորապես, արգելք է սահմանվել 70 տարին լրացած քաղաքացիների համար, որպեսզի նրանք չկարողանան մասնակցել բարձր ռիսկային խաղերին (մինչ այս արգելք կար մինչև 21 տարեկան անձանց մասով):
Սահմանափակումներ են մտցվել նաև այն պաշտոնատար անձանց համար, ում ֆինանսավորումը տրամադրվում է պետական կամ համայնքային բյուջեներից: Խաղերին մասնակցությունն արգելվում է պետական, համայնքային ծառայության և հանրային պաշտոն զբաղեցնողներին, հանրային իշխանության մարմիններում քաղաքացիական աշխատանք կատարողներին, պետական և համայնքային ոչ առևտրային կազմակերպությունների ու պետության կողմից հիմնադրված հիմնարկների աշխատողներին, 50% և ավել պետական մասնակցությամբ ընկերությունների, ինչպես նաև Կենտրոնական բանկի աշխատակիցներին։
Հստակեցվել է նաև ինտերակտիվ հարթակներում ինքնաարգելափակման կոճակի աշխատանքը: Կազմակերպիչը պարտավոր է իր կայքի և բջջային հավելվածի յուրաքանչյուր էջում ապահովել «ինքնաարգելափակում» անվանմամբ կոճակի մշտական, տեսանելի ու հասանելի առկայությունը, որը պետք է զբաղեցնի էջի տեսանելի հատվածի առնվազն 5%-ը կամ համապատասխանի Կառավարության սահմանած չափանիշներին՝ առանց հավելյալ որոնման կամ էջափոխման անհրաժեշտության: Կոճակի հարևանությամբ պարտադիր պետք է ցուցադրվի տվյալ պահին միասնական համակարգում գրանցված ինքնաարգելափակված անձանց ընդհանուր թիվը։
Կոճակն ակտիվացնելուց հետո քաղաքացուն պետք է ցուցադրվի բացառապես մեկ հաստատման պատուհան՝ «Դուք հաստատում եք, որ ցանկանում եք ինքնաարգելափակվել ձեր խաղեր մասնակցելու իրավունքը» բովանդակությամբ և երկու ընտրությամբ՝ «հաստատում եմ» և «չեմ հաստատում»։ Հաստատելու պահից դիմումը համարվում է ընդունված, և կազմակերպիչը պարտավոր է առավելագույնը 1 րոպեի ընթացքում դադարեցնել անձի մասնակցությունը խաղերին: Այս քայլից հետո արգելվում է պահանջել լրացուցիչ փաստաթղթեր, լուսանկարներ կամ տեսագրություններ (բացառությամբ օրենքով պարտադիր նույնականացման բացակայող տվյալների):
Օպերատորին արգելվում է կիրառել սպասման ժամանակահատված, մտածելու ժամանակ կամ հետաձգում, ցուցադրել լրացուցիչ պատուհաններ, գովազդային նյութեր, բոնուսներ և խրախուսող առաջարկներ: Արգելվում է նաև ուղղակի կամ անուղղակի կերպով՝ հեռախոսազանգերի, հաղորդագրությունների (SMS), էլեկտրոնային փոստի, փուշ-ծանուցումների կամ սոցիալական ցանցերի միջոցով ուղարկել խաղերի մասնակցությունը խթանող նյութեր:
Ինքնաարգելափակման կոճակը կիրառելուց հետո կազմակերպիչը պարտավոր է դիմողի անունը, ազգանունը, հայրանունը, հանրային ծառայության համարանիշը, դիմումի օրն ու ժամը անհապաղ փոխանցել օպերատորին, իսկ մինչև դրա գործարկումը՝ լիազոր մարմնին, որպեսզի տվյալները փոխանցվեն մյուս խաղային օրերատորներին՝ անձի մասնակցությունը բոլոր տեղերում արգելափակելու համար: Հայկ Սարգսյանը նշեց, որ կառավարության ներկայացրած բոլոր առաջարկներն ընդունվել են, և կոչ արեց կողմ քվեարկել նախագծին: