Բասկետբոլի Հայաստանի հավաքականը Երևանում մարտի 2-ին կընդունի Բուլղարիային

Բասկետբոլի Հայաստանի ազգային հավաքականը Եվրոբասկետ 2029-ի նախընտրական փուլի շրջանակում վաղը՝ մարտի 2-ին, Երևանում կմրցի Բուլղարիայի հավաքականի հետ: Մինչ այդ Հայաստանի հավաքականը Սպորտի կառավարման կենտրոնի մարզահամալիրում այսօր անցկացրել է վերջին մարզումը:

Հայաստանի հավաքականի գլխավոր մարզիչ Բոգդան Կարաչիչի խոսքով՝ թիմում հիանալի մթնոլորտ է. «Կարելի է ասել՝ նոր խումբ է հավաքվել, ավելի շատ են երիտասարդ տղաները, որոնք շատ ոգևորված են և ուրախ՝ Հայաստանը ներկայացնելու համար: Երիտասարդ հայ տղաների խումբ է, որոնք առաջին անգամ են միասին խաղալու:

Կներդնենք մեր ողջ ուժերը՝ հույս ունենալով, որ դրական արդյունքի կհասնենք: Հույս ունենք՝ մեծ թվով երկրպագուներ կաջակցեն մեզ վաղվա խաղում: Կարող եմ խոստանալ, որ լավագույնս կներդնենք մեր ուժերը և կանենք ամեն ինչ բարձր մակարդակով հանդես գալու համար»:

Հայաստանի հավաքականի կազմում ընդգրկված են Ալբերտ Թադևոսյանը, Յուրա Մելիքյանը, Վալերի Աղաջանյանը, Դանիել Կիրակոսյանը, Արկադի Մկրտիչյանը, Դանիել Գևորգյանը, Տիգրան Մկրտումյանը, Կարեն Մելիքյանը, Դավիթ Խաչատրյանը, Խավիեր Քիլիսլյանը, Դարիուս Մաքգինը, Դենիել Սանամյանը, Մարատ Միքայելյանը, Արայիկ Գևորգյանը, Արթուր Ավագյանը և Ներսես Ավագյանը:

Հայաստան-Բուլղարիա հանդիպումը կկայանա մարտի 2-ին և կմեկնարկի ժամը 20:15-ին: Հանդիպման տոմսերը կարող եք ձեռք բերել առցանց՝ Tomsarkgh.am կայքից: