Կաշառք և դատարանի որոշման անտեսում․ աղմկահարույց իրավական գործեր՝ Երևանում ղեկավար պաշտոն զբաղեցնողների հանդեպ
Կասեցվել են Երևանի քաղաքապետարանի տրանսպորտի վարչության պետի լիազորությունները՝ դատարանի վճռով ուժի մեջ մտած դատական ակտը չկատարելու և գնումների գործընթացում ոչ իրավաչափ գործողություններ կատարելու մեղադրանքով։ Իրավական կառույցները սրան զուգահեռ հայտարարել են նաև Մալաթիա-Սեբաստիա վարչական շրջանի որոշ պաշտոնյաների չարաշահումների մասին։ Վերջինի դեպքում, ըստ պաշտոնական հաղորդագրության, պաշտոնյաները «աչք են փակել» ապօրինի շինությունների վրա՝ քաղաքացիներից պահանջելով խոշոր գումարներ։
Երևանի քաղաքապետարանի տրանսպորտի վարչության պետ Վազգեն Հարությունյանի նկատմամբ հարուցվել է հանրային քրեական հետապնդում՝ դատական ակտը չկատարելու կամ դրա կատարմանը խոչընդոտելու դեպքի առթիվ նախաձեռնված քրեական վարույթի նախաքննության ընթացքում։ Հարությունյանի պաշտոնավարման դադարեցումը «Ռադիոլուր»-ին ի պատասխան հաստատեցին Երևանի քաղաքապետարանից՝ տեղեկացնելով, որ նրա հանդեպ խափանման միջոց է կիրառվել բացակայելու արգելքը։
Վազգեն Հարությունյանը լրատվամիջոցների հետ զրույցում չի ընդունել մեղքը։
«Մեղադրանքին ծանոթացել եմ, դիրքորոշում եմ հայտնել, որ մեղադրանքի հետ համաձայն չեմ։ Մանրամասն ներկայացրել եմ փաստական բոլոր ապացույցները, որոնք ամբողջությամբ հերքում են մեղադրանքը»։
Դատական տեղեկատվական համակարգից ՝ Datalex-ից, տեղեկանում ենք, որ Երևանի քաղաքապետարանի տրանսպորտի վարչության արդեն նախկին պետի նկատմամբ քրեական գործի հիմքում պետգնման գործընթաց է։ Դատարանը ոչ իրավաչափ է ճանաչել, մեջբերում, Երևանի քաղաքապետարանի 2023 թվականի փետրվարի 6-ին կնքած N ԵՔ-ԳՀԱՇՁԲ-23/10 գնման պայմանագրի շրջանակում աշխատանքի և ապրանքի 10 տարի ժամկետով բանկային երաշխիք պահանջելը․ մեջբերման ավարտը։
Ավելի պարզ․ Երևանի քաղաքապետարանն ու «Իմպեքս» ՍՊԸ-ն 2023 -ի փետրվարին կնքել են ճանապարհային նշանների տեղադրման պայմանագիր։ Սակայն աշխատանքը դեռ չսկսած՝ քաղաքապետարանը միակողմանի լուծել է կնքված պայմանագիրը ու «Իմպեքս» ՍՊԸ-ն ավելացրել գնման գործընթացին մասնակցելու իրավունք չունեցող մասնակիցների ցուցակում՝ որպես պատճառ նշելով, որ տնտեսվարողը 10 տարվա բանկային երաշխիք չի ներկայացրել։ Այս պահանջն ու կասեցումը տնտեսվարողը վիճարկել է դատարանում։
Արդյունքում դատարանն անվավեր է ճանաչել որոշումը՝ ընկերությանը վերադարձնելով գնումների գործընթացին մասնակցելու իրավունք ունեցող մասնակիցների ցուցակ։
Այդ ընթացքում, չնայած դատարանի ուղիղ արգելքին՝ այն է՝ դատական գործընթացի ընթացքում ճանապարհային նշանների տեղադրման այլ մրցույց չհայտարարել, ոչ միայն դադարեցվել է գործակցությունը «Իմպեքս» ՍՊԸ-ի հետ, այլև հայտարարվել է նոր մրցույթ՝ մեղմացված պայմաններով: Հատկանշական է, որ հայտարարված մրցույթի բնութագրերից հանվել է 10 տարվա բանկային երաշխիքի կետը, ինչը ընկերության մոտ կողմնակալության կասկածներ է առաջացրել: Հենց դատարանի որոշումը բացահայտ կերպով ենթադրաբար անտեսելն էլ դարձել է քրեական գործի հարուցման առիթը:
Աղմկահարույց գործեր կան նաև վարչական շրջանների ղեկավարների աշխատակազմերում։ Պաշտոնական հաղորդագրությամբ՝ պաշտոնատար անձինք օգտագործել են ծառայողական լիազորությունները։
Ըստ Հակակոռուպցիոն կոմիտեի վերջին հաղորդագրության՝ Մալաթիա-Սեբաստիա վարչական շրջանի ղեկավարի աշխատակազմի որոշ պաշտոնյաներ կաշառք են ստացել քաղաքացիների ապօրինի գործողություններն անտեսելու համար, մեջբերում․
«Նախաքննությամբ պարզվել է, որ պաշտոնատար անձանցից մեկը, նախապես տեղյակ լինելով նույն վարչական շրջանում քաղաքացու կողմից առանց թույլտվության իրականացվող ապօրինի շինարարական աշխատանքների մասին, 2025 թվականի նոյեմբերին նրանից պահանջել է 200․000 դրամ կաշառք՝ մինչև 2,5 միլիոն դրամի չափով տուգանք առաջացնող իրավախախտումը չարձանագրելու համար»։
Նման մեկ այլ դեպքում 2025 թվականի հոկտեմբերին բնակչից կաշառք են պահանջել ու ստացել՝ ապօրինի շինարարությունն, այսպես ասած, չնկատելու և տուգանք չնշանակելու դիմաց։
Նախորդիվ Արաբկիր վարչական շրջանն էր աղմուկի կենտրոնում․ վարչական շրջանի ղեկավարը կալանավորվեց, իսկ հետո սեփական դիմումի համաձայն հեռացավ պաշտոնից։ Արաբկիր վարչական շրջանի ղեկավարի աշխատակազմում քննչական գործողությունների արդյունքում 8 անձի, այդ թվում՝ 3 պաշտոնյայի մեղադրանք առաջադրվեց։ Դատարանը կիրառեց տարբեր խափանման միջոցներ. երկու պաշտոնյա և երկու անձ կալանավորվեց, մեկ պաշտոնյա հայտնվեց տնային կալանքի տակ՝ 30 մլն դրամ գրավի դիմաց, երեքի նկատմամբ սահմանվեց բացակայելու արգելք։
Աղմկահարույց զարգացումներից նախորդ տարի զերծ չմնաց նաև քաղաքապետարանի կենտրոնական ապարատը․2025-ի փետրվարի 5-ին ձերբակալվել էին մի խումբ պաշտոնյաներ, որոնց թվում էր հասարակական կարգի պահպանության ծառայության արդեն նախկին պետ Արամ Գյուլզադյանը։ Վերջինիս մեղադրանք առաջադրվեց խոշոր չափի կաշառք ստանալու համար՝ պաշտոնեական դիրքն ու ազդեցությունը քաղաքացու օգտին օգտագործելու նպատակով։ Հաջորդիվ դատարանը որոշել էր Գյուլզադյանին ազատ արձակել կալանքից՝ որպես խափանման նոր միջոց սահմանելով 5 միլիոն դրամ գրավն ու վարչական հսկողությունը։
«Ռադիոլուր»
Իրանի դեմ հարվածների ֆոնին ՀԱԵ Ատրպատականի թեմը դադարեցրել է եկեղեցական արարողությունները
Հայաստանն ու Իրանն աշխատում են սահմանին երկրորդ կամրջի նախագծի վրա
Եվրախորհրդարանի պատգամավորները չեն կարողացել աշխարհի քարտեզի վրա գտնել Իրանը
Լարիջանիի սպանությունից հետո Իրանը կասետային ռումբերով հարվածել է Թել Ավիվին
Իրանի հարստացված ուրանի պաշարները միջուկային օբյեկտների փլատակներում են
Անկանխիկ ստացման եղանակի անցնելու դիմում չներկայացրած կենսաթոշակառուի համար բանկը ընտրել է ՄՍԾ-ն՝ ին...
Եվրամիությունը չի հասկանում Իրանում պատերազմի նպատակները. Կալաս
Երևանում և մարզերում կլինեն էլեկտրաէներգիայի ընդհատումներ
ԱԹՍ-ի հարվածի հետևանքով Դուբայի միջազգային օդանավակայանի մոտ հրդեհ է բռնկել
ԱՄԷ նախագահն ու Սաուդյան Արաբիայի թագաժառանգը քննարկել են տարածաշրջանային զարգացումները